Առաջնորդական Պատգամ «Հայաստան» Համահայկական Հիմնադրամի 2018-ի Դրամահաւաքին Առիթով

0
515

Սիրելի՛ հայորդիներ որ ի Լիբանան,

«Հայաստան» համահայկական հիմնադրամի Լիբանանի Գործադիր մարմինը այս տարի եւս կը հրաւիրէ լիբանանահայութիւնը իր մասնակցութիւնը բերելու մեր հայրենիքին` Հայաստանի եւ Արցախի զարգացման կենսական բնագաւառին:

Հայրենիքը կը շինուի հայուն միտքով եւ բազուկով ու կը պահպանուի հայուն ուժով եւ արիւնով: Աշխարհասփիւռ հայութիւնը իր հայրենանուէր անքակտելի պատկանելիութիւնը կ՛արտայայտէ աշխատանքով եւ ի պահանջել հարկին` նահատակութեամբ: Մեր պատմութիւնը լեցուն է հայրենիքի կերտման եւ պաշտպանութեան բազմաթիւ ներշնչիչ դրուագներով, ուր մանաւանդ ընդգծուած է մեր ժողովուրդին հաւաքական ներկայութիւնը: Այսօր եւս նո՛յն մարտահրաւէրին դիմաց կը գտնուինք եւ նոյն նախանձախնդրութեամբ մեր ԱՅՈ՛-ն կ՛ըսենք մեր որդիական նիւթաբարոյական զօրակցութիւնը արտայայտելով Հայաստանի եւ Արցախի հանդէպ:

Իւրաքանչիւր հայորդի, անձնազոհութեան սկզբունքէն մղուած, պարտաւոր է «Հայաստան» համահայկական հիմնադրամի «Բերքառատ Արցախ» ծրագիրը սեփականացնելու, եւ, լիբանանահայութեան պարագային, ասոր կցելու «Փոխե՛նք ներկան` կերտելու ապագան» կարգախօսը` Սպիտակի երկրաշարժի 30-ամեակի յամեցող սպիները դարմանելու համար մեր հայրենակիցներուն նորակառոյց բնակարաններ նուիրելու կոչին վեհանձնօրէն ընդառաջելով, նոյնիսկ երբ մեր ընկերային-տնտեսական վիճակը այնքան ալ փայլուն չէ:

Լիբանանահայութիւնը յաւելեալ դրդապատճառ մը եւս ունի «Հայաստան» համահայկական հիմնադրամի Լիբանանի Գործադիր մարմինի առաջադրած Գիւմրիի շրջանին մէջ չորս ընտանիք նոր բնակարաններով օժտելուն մասնակցելու, որովհետեւ մեզ կանխող անմիջական սերունդը եւս, մօտաւոր անցեալին, իբրեւ Հայոց ցեղասպանութենէն վերապրող, խեղճ պայմաններ դիմագրաւելով թիթեղաշէն խրճիթներու մէջ ապրեցաւ եւ իր ճակտի քրտինքով քարաշէն եկեղեցի, դպրոց, ակումբ ու տուն կառուցեց եւ մեզի կտակեց:

Ականջալուր մեր մեծ ծնողներուն մշտահունչ ձայնին, եկէ՛ք հայուն վայել յանձնառութեամբ ընդառաջենք հայրենիքի յարաճուն շինութեան եւ առաւել ծաղկման` մեր երազած հայրենիքը ունենալու հեռանկարին հաւատարմութեամբ:

ՆԱՐԵԿ ԱՐՔԵՊԻՍԿՈՊՈՍ
ԱՌԱՋՆՈՐԴ ԼԻԲԱՆԱՆԻ ՀԱՅՈՑ

29 նոյեմբեր 2018
Պէյրութ-Լիբանան

LEAVE A REPLY

Please enter your comment!
Please enter your name here