Անգարա Իրեն Կը Վերապահէ Սուրիոյ Հիւսիսային Շրջանին Մէջ «Ինքնապաշտպանութեան Իրաւունքը»

0
219

ԱՆԳԱՐԱ, «Ռոյթըրզ».- Թուրքիոյ ազգային ապահովութեան խորհուրդը՝ նախագահ Ռեչեփ Թայիփ Էրտողանի գլխաւորութեամբ գումարած իր նիստէն ետք հրապարակեց յայտարարութիւն մը, որուն մէջ նշած է, թէ թրքական զինեալ ուժերը Սուրիոյ հիւսիսային շրջանին մէջ պիտի օգտագործեն «ինքնապաշտպանութեան իրենց իրաւունքը»՝ անպատասխան չձգելով քիւրտ զինեալներու կողմէ որեւէ գործողութիւն:

Յայտարարութեան մէջ կը նշուի, որ Թուրքիոյ հարաւային սահմանամերձ շրջաններուն ապահովութիւնը երաշխաւորելու նպատակով, Թուրքիա վճռականօրէն պիտի շարունակէ պայքարը քրտական զինեալ ջոկատներու դէմ, զորս կը նկատէ նաեւ «Սուրիոյ տագնապի քաղաքական լուծման մեծագոյն սպառնալիքներէն»:

Կը շեշտուի նաեւ, թէ թրքական զինեալ ուժերը պիտի շարունակեն Իրաքի հիւսիսային շրջանին մէջ քիւրտ զինեալներու դիրքերը ոչնչացնելու իրենց գործողութիւնները:

Նախքան վերոնշեալ նիստը, նախագահ Էրտողան Միացեալ Նահանգներուն կոչ ուղղած էր՝ քրտական Ժողովուրդի պաշտպանութեան ջոկատներուն աջակցութիւնը դադրեցնելու, ազդարարելով, որ այլապէս թրքական բանակը «պէտք եղածը պիտի ընէ», պնդելով, որ քրտական ուժերուն իսկական թիրախը Թուրքիան է:

«Եթէ Միացեալ Նահանգները մէկ կողմ քաշուի մեր երկիրը թիրախաւորող ահաբեկիչներու թիկունքէն, մենք պիտի հասկնանք, որ անոնք իբրեւ դաշնակից Թուրքիոյ կողքին են», ըսաւ Էրտողան։

LEAVE A REPLY

Please enter your comment!
Please enter your name here