ՀԲԸՄ-ՀԵԸ՝ 32 ՎԱՐՉՈՒԹԻՒՆՆԵՐՈՒ ՄԱՍՆԱԿՑՈՒԹԵԱՄԲ ԳՈՒՄԱՐԵՑ ՏԱՐԵԿԱՆ ՎԱՐՉԱԿԱՆ ԸՆԴՀԱՆՈՒՐ ԺՈՂՈՎԸ

0
351

Կիրակի, 2 Դեկտեմբեր  2018-ի առաւօտեան, ՀԲԸՄ-ՀԵԸ –ի  Կեդրոնական  Վարչութեան  հովանաւորութեամբ,  ՀԵԸ-ի  32 վարչութիւններու   երկու  հարիւր յիսունէ աւելի  անդամ-անդամուհիներու  մասնակցութեամբ,  ՀԲԸՄ- ՀԵԸ-ի Զապէլ   Մովսէսեան կեդրոնին մէջ   տեղի ունեցաւ ՀԲԸՄ-ՀԵԸ-ի  Տարեկան Վարչական  Ընդհանուր  Ժողովը:

Լիբանանի, Հայաստանի,  ՀԲԸՄ-ի եւ ՀԵԸ-ի քայլերգներու  յոտնկայս  ունկընդրութենէն  ետք,  ՀԵԸ-ի Կեդրոնական Վարչութեան ատենապետ Վիգէն Չերչեան  բարի գալուստ մաղթեց  ներկաներուն, ի մասնաւորի ՝ ՀԲԸՄ-ի  Լիբանանի Շրջանակային Յանձնաժողովի եւ ՀԵԸ-ի Կեդրոնական Վարչութեան անդամներուն: Ան նշեց, թէ  վարչական ընդհանուր  ժողովը  անցնող տարուան  գործունէութիւնը արժեւորելու առիթ  մը  ըլլալէ աւելի,  ապագայի   ծրագիրներ  մշակելու,զանոնք  նոր վճռակամութեամբ եւ եռանդով շարունակելու ուխտավայր  մըն է   Միութեան բոլոր   միաւորներուն համար: ՀԵԸ-ի Կեդրոնական Վարչութեան ատենապետը,  մէկ առ մէկ գնահատեց  սկաուտական, մարզական,  մշակութային, երիտասարդական միաւորներուն  աշխատանքը:

Վիգէն Չերչեան  շնորհակալութեան  յատուկ խօսք  ուղղեց ՀԲԸՄ-ի Լիբանանի Շրջանակային Յանձնաժողովին  եւ անոր  ատենապետ  տիար  Ժերար Թիւֆենքճեանին`  ՀԵԸ-ի  միջոցառումներուն  անմնացորդ   նուիրումով օժանդակելու   համար:  Ան  միաժամանակ  շնորհակալութեան խօսք յղեց  ՀԵԸ-ի Կեդրոնական Վարչութեան  անդամներուն եւ ՀԵԸ-ի գրասենեակին:

ՀԲԸՄ-ի  Լիբանանի Շրջանակային Յանձնաժողովի ատենադպիր  տիկին Սիլվա Լիպարիտեան ժողովին  փոխանցեց ՀԲԸՄ-ի  Լիբանանի Շրջանակային Յանձնաժողովի  ատենապետ  տիար  Ժերար  Թիւֆենքճեանի  բարեմաղթութիւնները:

Ընդհանուր  վարչական  ժողովի առաջին բաժնին մէջ,  ՀԲԸՄ-ՀԵԸ-ի վարչութիւնները գրաւոր  եւ   մեծ պաստառի վրայ տեսաերիզի օգնութեամբ  ներկայացուցին անցնող տասներկու ամիսներուն  իրենց  գործունէութիւնը:

Խօսք առնողները  յայտնապէս շեշտեցին    իրենց   ծրագիրներուն յաջողութեան   մէջ  ՀԲԸՄ-ի  Լիբանանի  Շրջանակային  Յանձնաժողովին եւ  ՀԵԸ-ի Կեդրոնական վարչութեան  հետեւողական ջանքերը:

Կարճ  դադարէ եւ յիշատակի  խմբանկարէն ետք,  Ընդհանուր  Վարչական Ժողովը  շարունակեց  իր  աշխատանքը,  քննարկելուվ  2019  տարեշրջանի  համար նախատեսուած  ծրագիրները,  իրենց   մօտաւոր նախահաշիւներով: Այս միջոցին տեղի ունեցաւ մտքերու  փոխանակում:  Առաջարկութիւնները  արձանագրուեցան, հետագայի  համար, առ ի  քննարկում:

Ընդհանուր  վարչական   ժողովը   եզրափակուեցաւ  ՀԵԸ-ի Կեդրոնական Վարչութեան ատենապետին ՝ հաւաքական  աշխատանքի կոչով:

ՀԵԸ-Ի ՄԱՄԼՈՅ ԵՒ  ՏԵՂԵԿԱՏՈՒԱԿԱՆ  ԳՐԱՍԵՆԵԱԿ

LEAVE A REPLY

Please enter your comment!
Please enter your name here