ՀԱՊԿի Գագաթնաժողովը Կը Յետաձգուի

0
258

ԵՐԵՒԱՆ, «Փանորամա».- ՀԱՊԿի երկիրներու ղեկավարներու հանդիպումը, որ տեղի պիտի ունենար 6 Դեկտեմբերին, չեղեալ յայտարարուեցաւ:

Ռուսիոյ նախագահ Վլատիմիր Փութինի օգնական Եուրի Ուշաքով Երեքշաբթի, 4 Դեկտեմբերին յայտարարեց, որ գագաթնաժողովը յետաձգուած է Հայաստանի խնդրանքով:

«Նկատի ունենալով մասնաւորապէս հայկական կողմի խնդրանքը, թէ նախընտրական շրջան է, որ կ՛աւարտի 9 Դեկտեմբերին, որոշեցինք ՀԱՊԿի գագաթնաժողով չգումարել», ըստ «Ինթերֆաքս»ի յայտնած է Ուշաքով՝ Մոսկուայի մէջ տեղի ունեցած մամլոյ ասուլիսին ընթացքին:

Ան նշած է, որ այդպիսով ՀԱՊԿի գլխաւոր քարտուղարի պարտականութիւնները կը շարունակէ կատարել Վալերի Սեմերիքով:

Յիշեցնենք, որ օրեր առաջ վարչապետի պաշտօնակատար Նիկոլ Փաշինեան յայտարարած էր, որ 6 Դեկտեմբերին նախատեսուող ՀԱՊԿի գագաթնաժողովը յետաձգել առաջարկած է Ռուսիոյ նախագահ Վլարտիմիր Փութին:

Արձագանգելով Ուշաքովի յայտարարութեան, Հայաստանի վարչապետի պաշտօնակատարի մամլոյ քարտուղար Արման Եղոյեան յայտարարեց, որ Հայաստան 6 Դեկտեմբերին կայանալիք ՀԱՊԿի գագաթնաժողովը յետաձգելու առաջարկ չէ ներկայացուցած:

LEAVE A REPLY

Please enter your comment!
Please enter your name here