Հայ Աւետ. Քոլեճի 95-ամեակի Պաշտօնական Ճաշկերոյթը

0
208

Քաղաքի Հայ աւետարանական քոլեճը, որ 1923-ին հիմնադրուած է եւ 1943-էն ի վեր սեփականութիւնն է Պէյրութի Հայ աւետ. Ա. եկեղեցիին, իր հիմնադրութեան 95-ամեակը նշեց պաշտօնական ճաշկերոյթով մը, Տըպպայէի «Լը Ռուայալ» պանդոկի «Ազուրէա» ճաշարանին մէջ:

Պաշտօնական ճաշկերոյթին հանդիսավար Աւօ Թիւթիւնճեանին հրաւէրով Հայ աւետ. Ա. եկեղեցիի հովիւ վեր. Հրայր Չոլագեանը աղօթք մատուցեց, որմէ ետք բեմ հրաւիրուեցաւ քոլեճի 1967-2017 տարիներու վաստակաւոր տնօրէն, ներկայիս պատուակալ տնօրէն եւ ճաշկերոյթի յանձնախումբի ատենապետ դոկտ. Զաւէն Մսըրլեանը` բացման խօսքին համար: Ան նշեց, որ անհատներու կեանքին մէջ 95 տարին յառաջացեալ ծերութեան տարիք է, բայց հաստատութիւններու պարագային, այդ կը նշանակէ 95 տարիներու հարուստ փորձառութիւն: Ապա պատուակալ տնօրէնը հակիրճ կերպով անդրադարձաւ յետեղեռնեան հայ սփիւռքի առաջին հայ երկրորդական վարժարանը (հայ սքուլ) հանդիսացող դպրոցին պատմութեան փուլերուն: Նշեց, որ դպրոցը ազգին տուած է 1595 շրջանաւարտներ, որոնք պատուաբեր դիրքերու հասած են կեանքի մէջ: Խօսքը աւարտեց` նշելով, որ ՀԱՔ-ի ջահը առկայծ է եւ կը պատրաստուի դիմաւորել իր հարիւրամեակը:

Միակտուր գործադրուեցաւ գեղարուեստական ճոխ յայտագիր մը` կատարողութեամբ Հուրի Աբարդեան-Ֆրետլիի եւ Զուիցերիայէն ժամանած ճազ նուագախումբին (Օլիվըր Ֆրիտլի, Փիուս Պաշնակըլ եւ Անտրէ Փուսա), որոնք ներկայացուցին հայկական եւ միջազգային ճազի կատարումներ:

Դպրոցի տնօրէն դոկտ. Արմէն Իւրնէշլեանը իր հակիրճ ելոյթին մէջ շեշտեց, որ իմաստութիւնն ու խրատը ճանչնալու եւ հանճարներուն խօսքերը ըմբռնելու համար (դպրոցին նշանաբանը) դրամը, աշակերտներուն թիւը, տարիներու վաստակը ու այլ նիւթական միջոցներ իսկական արժէքի եւ որակաւոր արդիւնքի կը վերածուին յանձնառու, գիտակից ու նուիրեալ աշխատանքով, որ կ՛իրականանայ ամենակալ Աստուծոյ ապաւինելով ու անոր ողորմութեան վստահելով: Իսկ Հայ աւետարանական քոլեճը իր այսօրուան հասած է ու վաղուան կը նայի այդ հաւատքով:

Խանդավառ մթնոլորտի մը մէջ տեղի ունեցաւ վիճակահանութիւն, որուն համար նկատի առնուած էին յատկապէս արուեստի գործեր եւ այլ արժէքաւոր նուէրներ:

Յանձնախումբին անունով Սիլվա Սողոմոնեանը քաջալերեց ներկաները` գործնականօրէն աջակից ըլլալու հայ դպրոցին եւ ապա յայտարարեց ճաշկերոյթէն առաջ եւ ընթացքին եղած նուիրատուութիւնները:

Վերջաւորութեան խօսք առաւ դպրոցի հոգաբարձութեան ատենապետ Ներսէս Պաղտոյեանը, որ Կանտիի հետեւողութեամբ նշեց, որ Հայ աւետ. քոլեճը ինքնին պատգամ մըն է յոյսի, սիրոյ եւ հաւատքի: Ան շեշտեց, որ սրահին մէջ ներկաները նաեւ իրենց ներկայութեամբ հաւատքի, յոյսի եւ սիրոյ պատգամ մըն է, որ կը ղրկեն Հայ աւետ. քոլեճին, որ դէպի իր հարիւրամեակը կը խոյանայ, ապա գնահատեց 95-ամեակի գոյգ ձեռնարկներու յանձնախումբերը եւ արուեստագէտներուն յանձնեց յուշանուէրներ:

Միութեան նախագահ վեր. Գարակէօզեանը ներկաներուն ուղղեց իր սրտի խօսքը: Ան դրուատիքով անդրադարձաւ ՀԱՔ-ի անցած ուղիին մասին` մաղթելով, որ դպրոցը իր առաքելութիւնը շարունակէ հարիւրամեակէն ալ անդին` եւս 95 տարի:

Հուսկ, վերապատուելիներ Գարակէօզեան, Հայտոսթեան եւ Չոլագեան, Ներսէս Պաղտոյեան, դոկտորներ Մսըրլեան եւ Իւրնէշլեան միասնաբար հատեցին 95-ամեակի կարկանդակը: Յաջող ձեռնարկի աւարտին ներկաները գոհ եւ ուրախ տրամադրութեամբ հեռացան սրահէն:

LEAVE A REPLY

Please enter your comment!
Please enter your name here