«Յառաջիկայ Նախագահական Ընտրութեան Թեկնածութիւնս Առաջադրելու Առումով Որեւէ Արգելք Չեմ Տեսներ» Ըսաւ Ասատ

0
34

Սուրիոյ նախագահ Պաշշար Ասատ երէկ գիշեր «Ալմայատին» պատկերասփիւռի արբանեակային կայանին հետ ունեցած հարցազրոյցին ընթացքին յայտարարեց, որ «յառաջիկայ նախագահական ընտրութեան թեկնածութիւնս առաջադրելու առումով որեւէ արգելք չեմ տեսներ», եւ որ թեկնածու ներկայանալը չի մերժեր:

Խօսելով Սուրիոյ հակամարտութեան մասին` Ասատ ըսաւ, որ իրենք ներկայիս Քայիտայի եւ անոր ճիւղաւորումներուն դէմ պայքարի հանգրուանի մէջ կը գտնուին` աւելցնելով, որ յառաջդիմութիւն արձանագրած են շարք մը մարզերու մէջ` ռազմական գետնի վրայ. ըստ անոր, ահաբեկիչները ժողովրդականութիւնը կորսնցուցած են եւ բազմաթիւ երկիրներ Սուրիոյ նկատմամբ իրենց քաղաքականութիւնը փոխած են:

Ան նշեց, որ Իրաքի ամերիկեան բռնագրաւման ընթացքին ահաբեկիչները Սուրիան կ’օգտագործէին իբրեւ անցք` Լիբանանէն դէպի Իրաք եւ Իրաքէն դէպի Լիբանան: Խօսելով ինքզինք մեկուսացնելու Լիբանանի քաղաքականութեան մասին` Սուրիոյ նախագահը յայտնեց, որ Լիբանան ուղղակի մասնակցութիւն ունեցաւ Սուրիոյ մէջ կրակը հրահրելուն` զէնքերու մատակարարմամբ եւ զինեալներու Սուրիա ներթափանցման արգելք չհանդիսանալով: Պատասխանելով այն պնդումին, թէ Լիբանանի նախագահ Միշէլ Սլէյման մէկ տարիէ ի վեր իրմէ հեռաձայն կը սպասէ` Ասատ ըսաւ, որ ինք ալ նախագահ Սլէյմանէն «անարդար կերպով ամբաստանուած» երեսփոխան Միշէլ Սմահայի հարցով Սուրիոյ մեղսակցութեան վերաբերեալ գէթ ապացոյցի մը կը սպասէ:

Ասատ բուռն յարձակում գործեց Սէուտական Արաբիոյ վրայ` յայտարարելով, որ այդ երկիրը ամերիկեան քաղաքականութիւնը ամենայն հաւատարմութեամբ կը գործադրէ եւ Միացեալ Նահանգներու ենթակայ է: Սակայն չբացառեց Սէուտական Արաբիոյ հետ յարաբերութեանց վերականգնումը, եթէ այդ մէկը սուրիացի ժողովուրդին շահերուն կը ծառայէ:

Խօսելով Թուրքիոյ մասին` Ասատ ըսաւ, որ Թուրքիոյ վարչապետ Ռեճեփ Թայիփ Էրտողան գաղափարախօսական պատճառներով աւելի հետաքրքրուած էր Իսլամ եղբայրներով, քան Սուրիա – Թուրքիա երկկողմանի յարաբերութիւններով: Էրտողան իբրեւ կրօնական կուսակցութեան մը ղեկավարը ինքզինք տարածաշրջանին մէջ փոքրամասնութիւն կը զգար եւ կ’ուզէր, որ Իսլամ եղբայրները իշխեն Սուրիոյ եւ Եգիպտոսի, որպէսզի ձերբազատի փոքրամասնութիւն մը ըլլալու զգացումէն: Ան ընդգծեց, որ Էրտողան պատեհապաշտ մըն է եւ անոր նպատակը իշխանութեան հասնիլն է: Իսկ Թուրքիոյ արտաքին գործոց նախարար Ահմեթ Տաւութօղլու կ’ուզէր, որ Սուրիոյ մէջ իշխանութեան հասնին Թուրքիոյ համակիր կողմերը: «Իրողութիւնները կը փաստեն, որ Թուրքիա Սուրիոյ մէջ ահաբեկիչներուն կ’աջակցի», յայտարարեց Ասատ` աւելցնելով, որ Թուրքիա վերջին ամիսներուն ընթացքին հազարաւոր քիւրտ քաղաքացիներ սպաննած է:

Սուրիոյ նախագահը ըսաւ, որ Սուրիական ազատ բանակէն ոմանք վերադարձան եւ սկսան պետական կառոյցներու մէջ գործել, ինչպէս նաեւ վերջին ամիսներու ընթացքին Սուրիոյ բանակին կողքին կռուելով նահատակներ տուին:

Խօսելով «Ժընեւ-2» միջազգային խորհրդաժողովին մասին` Ասատ յայտնեց, որ անոր գումարման պաշտօնական թուական գոյութիւն չունի, եւ խորհրդաժողովին շուրջ բազմաթիւ հարցականներ կան: Ան շեշտեց, որ Սուրիոյ տագնապին լուծումը սուրիական լուծում մը պէտք է ըլլայ` աւելցնելով, որ կարեւորը այն է, որ սուրիացի ժողովո՛ւրդը ընդունի լուծումը, եւ ոչ թէ օտարները:

Ասատ ՄԱԿ-ի եւ Արաբական լիկայի Սուրիոյ հարցով յատուկ պատուիրակ Լախտար Իպրահիմիի կոչ ուղղեց` յառաջիկայ օրերուն Դամասկոս իր այցելութեան ընթացքին իր առաքելութեան ծիրին մէջ մնալու` նշելով, որ Իպրահիմի նախապէս իր կատարած այցելութեան ընթացքին առաջարկած էր, որ 2014-ին ինք նախագահական թեկնածու չներկայանայ, իսկ ինք պատասխանած է, որ այդ հարցը սուրիացի չեղողի մը հետ չի քննարկեր:

Նշենք, որ Միացեալ Նահանգներու արտաքին գործոց նախարար Ճոն Քերրի երէկ յայտարարեց, որ Ասատի կողմէ այդպիսի քայլ մը սուրիական հակամարտութիւնը պիտի երկարաձգէ:

 

LEAVE A REPLY

Please enter your comment!
Please enter your name here