Ի՞ՆՉ ԹԵԼԱԴՐԵՑ ՊԱՆ ՔԻ ՄՈՒՆ ԼԻԲԱՆԱՆՑԻՆԵՐՈՒՆ

Ին՞չ կը հետապնդէր ՄԱԿ-ի ընդհանուր քարտուղարին Լիբանան այցելութիւնը: Պան Քի Մունի Լիբանան այցելութիւնը կրնար սովորական բնոյթ կրել, եթէ նախօրէին, Հըզպալլայի օրէնսդիր խորհուրդի նախագահ շէյխ Մուհամմէտ Եազպէք իր ընդդիմութիւնը չյայտարարեր` Պան Քի Մունի այցելութեան: ՄԱԿ-ի ընդհանուր քարտուղարը լիբանանեան հողերու վրայ իր ոտքը դնելէ առաջ իսկ, անոր քաղաքական հոսանքներուն միջեւ դարձաւ քաշքշուքի նոր օրակարգ: ՄԱԿ-ի ընդհանուր քարտուղարին Լիբանան այցելութիւնը կը զուգադիպէր շրջանային կարեւոր զարգացումներու մէկ ժամանակահատուածին:
Բայց աւելի կարեւորը` լիբանանցիներուն հետ քննարկելիք անոր օրակարգերուն վրայ նշանակալից տեղ կը գրաւէր Միջազգային Ատեանին գործունէութեան պայմանաժամը վերանորոգելու թղթածրարը: Ճիշդ այս պատճառով, Հըզպալլայի ընդհանուր քարտուղար Հասան Նասրալլա վերջերս, վարչապետ Նեժիպ Միքաթիի հետ ունեցած իր հանդիպման ընթացքին, անոր յայտնած էր այս հարցին վերաբերեալ իր կտրական ընդդիմութիւնը: Նասրալլա, մինչեւ իսկ թելադրած էր, Պան Քի Մունի հայեցողութեան ձգել Ատեանին գործունէութեան ժամկէտը վերանորոգելու որոշումը, սակայն` առանց Լիբանանի հաւանութեան: Փաստօրէն, Նասրալլայի դատողութեամբ հայցուորը պիտի մերժէր իր հայցը:
Դէպի ու՞ր կը փափաքի տանիլ սէյիտ Նասրալլա Լիբանանը: Փաստօրէն Հըզպալլայի ընդհանուր քարտուղարը Միջազգային Ատեանի միջոցաւ Լիբանանը աւելի պիտի փորձէ խրել շրջանային խաղատոմսերուն մէջ: Ին՞չ քայլերու կրնայ դիմել Հըզպալլան, երբ քաղաքային անվտանգութիւնը խանգարելու ընտրանքը փակուած է անոր առջեւ: Ո՞վ պիտի դէմ դնէ Հըզպալլայի զէնքին, երբ այսօրուան ընդդիմութիւնը կը մերժէ զէնքի մշակոյթը եւ կը հաւատայ երկխօսութեան ընտրանքին: Հետեւաբար, Հըզպալլա պիտի փորձէ քաղաքական նոր փոթորիկ մը ստեղծել Լիբանանի մէջ: Սակայն քաղաքական փոթորիկ ստեղծելու անոր յոյսերը ի դերեւ կրնան դուրս գալ` շրջանային վերիվայրումներուն լոյսին տակ: Հըզպալլա պատրաս՞տ է ինքնասպանութեան: Երկրորդ եւ կարեւոր կէտ մը, որքան ալ որ ուժերը որակումներ կատարուին, Նեժիպ Միքաթիի գլխաւորած կառավարութիւնը կը վայելէ միջազգային ընտանիքին յարգանքը եւ այնքան ալ միագոյն կառավարութիւն մը չէ ըստ իրողութեան: Հանրապետութեան նախագահը, վարչապետ Նեժիպ Միքաթի եւ Ուալիտ Ճոմպլաթ` իրենց շրջահայեաց եւ հաւասարակշռուած քաղաքականութեամբ , կրնան որեւէ մէկ պահուն փոքրամասնութեան վերածել այսօրուան մեծամասնութիւնը: Մինչեւ ու՞ր պատրաստ է երթալու Հըզպալլա…: Ատեանը ֆինանսաւորելու դէմ անոր արշաւը ձախողութեան մատնուելէ ետք, սէյիտ Նասրալլա կը մերժէ որ Լիբանան նոր ՙփրոթոքոլ՚ մը ստորագրէ Միջազգային Ատեանին առնչութեամբ: Զարմանալի թող չթուի լիբանանցիներուն, երբ յայտնեք, թէ այնքան ալ անմեղ ու պատահականութեան հետեւանք չեն ելեկտրականութեան, բջիջային հեռաձայնի գիծերու բաշխման, վառելանիւթի, աշխատավարձերու յաւելման, ծովային նաւթէն օգտուելու, ընկերային եւ ապահովական զանազան հարցերու շուրջ ստեղծուած միջադէպերը: Այդ բանավէճերուն տակ պահուած են քաղաքական ուժերուն միջեւ առկայ տարակարծութիւններուն խորագիրները:
Պան Քի Մուն Լիբանան այցելեց եւ իրազեկ դարձաւ լիբանանեան գրեթէ բոլոր կողմերուն տեսակէտներուն: Ան լիբանանցիներուն փոխանցեց հին եւ նոր պատգամներ, որոնց գործադրութիւնը մէկ մասը անմիջականօրէն կախեալ է լիբանանցիներու ընթացքէն, մնացեալը` շրջանային ուժերու միջեւ փոխյարաբերութիւններէն: Պան Քի Մուն Լիբանանի մէջ զգաց, որ ոչ բոլոր լիբանացիները համաձայն են Լիբանանի վերաբերեալ ՄԱԿ-ի Ապահովութեան Խորհուրդի բանաձեւերուն: Պան Քի Մուն ինք եւս գիտէ, թէ միայն լիբանանցիներու բարի ցանկութիւններէն կախեալ չեն թիւ 1559 եւ 1701 բանաձեւերուն գործադրութիւնը: Շատ մը հարցեր կախեալ են Միացեալ Նահանգներու եւ միջազգային ընտանիքին հետ Սուրիոյ եւ Իրանի փոխյարաբերութիւններէն: Փաստօրէն, Պան Քի Մուն իր շփումներուն ընթացքին փոխանցեց պատգամներ եւ լսեց պատգամներ: Սակայն ամենակարեւոր պատգամը, որ ՄԱԿ-ի ընդհանուր քարտուղարը փոխանցեց լիբանանցիներուն, հետեւեալն էր, որ միջազգային ընտանիքը կախարդան գաւազաններ չունէր լուծելուª հարաւային Լիբանանէն իսրայէլեան զօրքերու հեռացումը, Հըզպալլայի զէնքը եւ Միացեալ Նահանգներ – Իրան մագլցող հակամարտութիւնը: Հետեւաբար, ան լիբանանցիներուն թելադրեց պահպանել արաբական աշխարհին մէջ Լիբանանը առանձնացող ժողովրդավարական հասարակարգը, երկիրը զերծ պահել շրջանային զարգացումներու ներազդեցութիւններէն եւ ամենակարեւորը` երկխօսութեան ճամբով լուծել ներքին տարակարծութիւնները:
ԱՀԱՐՈՆ ՇԽՐՏԸՄԵԱՆ
www.araraddailynews.com

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button
 

STAINLESS STEEL

 

–>