Գործիչները Նստացոյցէն Պիտի Անցնին Աւելի Ազդու Միջոցներու

0
29

«Վճարում ենք 100 դրամ» շարժման անդամները, որոնք մինչ օրս նստացոյց կը կատարեն Երեւանի քաղաքապետարանին մօտ՝ պահանջելով քաղաքապետարանի երկու պաշտօնեաներու՝ Հենրիկ Նաւասարդեանի ու Միսակ Համբարձումեանի հեռացումը իրենց պաշտօններէն, 22 Հոկտեմբերին վերջնագիր ներկայացուցին:
Նստացոյցին մասնակից գործիչները նկատել տուին, որ սպառած է այն ողջամիտ ժամկէտը, որուն ընթացքին աւագանին եւ քաղաքապետը կարելիութիւն ունէին վերլուծելու ստեղծուած իրավիճակը եւ կայացնելու օրինականութեան հաստատման եւ հանրային շահին ծառայող որոշումներ:
Գործիչները հրապարակեցին յայտարարութիւն մը՝ նշելով, թէ յիշեալ երկու պաշտօնեաները եթէ յաջորդող 7 օրերուն ընթացքին պաշտօնանկ չըլլան, իրենք պիտի դադրեցնեն նստացոյցը եւ անցնին աւելի սուր ու աշխոյժ գործողութիւններու:
Նստացոյց ընող երիտասարդները 22 Հոկտեմբերին կոչով դիմեցին բոլոր այն քաղաքացիներուն, քաղաքացիական նախաձեռնութիւններուն, քաղաքական միաւորներուն, որոնք կարեւոր կը նկատեն երկրին մէջ անպատժելիութեան, անօրինութեան մթնոլորտի վերացումը, պատասխանատուութեան հիմնարկներու կայացումը, փոխադրութեան բնագաւառին մէջ համակարգային փոփոխութիւններու անհրաժեշտութիւնը, միանալ իրենց եւ միասնական օրակարգ ձեւաւորել՝ բարձրացուած խնդիրներու լուծման համար:
Անոնք լրագրողներուն ներկայացուցին նստացոյցին ընթացքին իրենց նկատմամբ կիրարկուած գործողութիւնները, ձերբակալութիւնները, դատական հայցերը եւ այլն՝ նշելով, որ ոչ թէ անուղղակի, այլ յստակ եւ ուղղակի ճնշումներ բանեցուած են իրենց վրայ՝ ստիպելու, որ դադրին պայքարելէ:

 

LEAVE A REPLY

Please enter your comment!
Please enter your name here