ԵԱՀԿ՝ ՍԱՀՄԱՆԱԳԻԾԻՆ ՎՐԱՅ ԴԻՏԱՐԿՈՒՄ ՊԻՏԻ ԿԱՏԱՐԷ ՈՒՐԲԱԹ ՕՐ

0
35

Նախապէս   ձեռք բերուած  պայմանաւորուածութեան  համաձայն,  ԵԱՀԿ-ի առաքելութիւնը,  Ուրբաթ, 25  Հոկտեմբերին դիտարկում մը  պիտի կատարէ   Լեռնային Ղարաբաղի եւ Ատրպէյճանի  զինուած ուժերու շփման   գիծին   միջեւ գտնուող  Մարտակերտի շրջանի  Լեւոնարխ  գիւղին   մօտակայքը:  Լեռնային Ղարաբաղի իշխանութիւնները պատրաստակամութիւն յայտնած են աջակցելու  դիտարկումը կայացնելու աշխատանքներուն, ապահովելով ԵԱՀԿ առաքելութեան անդամներու անվտանգութիւնը: Նշենք, թէ վերջին  օրերուն  մտահոգիչ զարգացումներ կ’արձանագրուին Ղարաբաղի եւ Ատրպէյճանի սահմանագիծին երկարութեան:

22 Հոկտեմբերին, Հայաստանի Տաւուշի մարզի Բերդ-Իջեւան ճամբուն Պառաւաքարի հատուածին մէջ, հակառակորդը կրակ բացած է ճամբայէն անցնող ինքնաշարժներու վրայ։ Կրակոցէն տուժած են քաղաքացիական, ինչպէս նաեւ զինուորական ինքնաշարժներու մէջ գտնուող անձեր։
Զինուորներուն մարտական հերթապահութիւն կատարողները տեղափոխող զինուորական ինքնաշարժներու ջոկատներուն վրայ բացուած կրակին իբրեւ հետեւանք՝ զոհուած է ժամկէտային զինուոր, շարքային Գարիկ Արտակ Պօղոսեան (ծնեալ՝ 1994)։ Հրազէնային տարբեր աստիճանի վէրքեր ստացած են ժամկէտային զինուորներ Արթուր Սերոբ Անդրանիկեան (ծնեալ՝ 1994), Արայիկ Նորիկ Ժամհարեան (ծնեալ՝ 1994) եւ Մարտին Վահրամ Պետրոսեան (ծնեալ՝ 1994)։
Դէպքին մասին իրազեկ դարձած է ԵԱՀԿ յատուկ ներկայացուցիչ Անճէյ Քասփըրչիքի գրասենեակը։
Պաշտպանութեան նախարարութիւնը  յայտարարեց, որ հակառակորդին գործած յանցանքը անպատասխան պիտի չմնայ, եւ անգամ մը եւս այս սադրանքի պատասխանատուութիւնը պիտի կրէ յարձակման դիմողը։ Պաշտպանութեան նախարարութիւնը ցաւակցութիւն  յայտնեց շարքային Գարիկ Արտակ Պօղոսեանի ընտանիքի անդամներուն, հարազատներուն եւ ծառայակիցներուն։

 

LEAVE A REPLY

Please enter your comment!
Please enter your name here