«ՉԵՄՓԻԸՆԶ ԼԻԿ» – ՌՈՆԱԼՏՕ ՆՈՐ ՅԱՂԹԱՆԱԿԻ ԱՌԱՋՆՈՐԴԵՑ ՌԷԱԼԸ

 Երէկ՝ Չորեքշաբթի երեկոյեան,  Եւրոպայի Ախոյեան Ակումբներու Ախոյեանութեան « Չեմփիընզ   Լիկ» բաժակի  խմբային  հանգրուանի մրցումներու  գծով  տեղի ունեցան  ութ   հանդիպումներ:

Շաբաթ օր, Սպանիոյ  ֆութպոլի ախոյեանութեան գծով  Պարչելոնայի դէմ  «Էլ Գլասիքօ»յի  նախօրէին,  Ռէալ Մատրիտ՝  2-1 արդիւնքով  տպաւորիչ յաղթանակ մը արձանագրեց  Իտալիոյ ախոյեան Եուվենթուսի դէմ:  Քրիսթիանօ Ռոնալտօ նշանակեց Ռէալի զոյգ  կոլերը, Լորենթէ՝ Եուվէի:  Ռէալի՝ 138  միլիոն տոլար արժած միջնապահ  Կարէթ Պէյլը, երկրորդ  կիսախաղին ներկայացաւ դաշտ: Սպանական  խումբը երեք  հանդիպումներէ   ետք,  ինը կէտով կը  գլխաւորէ  Բ. Խմբակը:  Եուվենթուս  ցարդ հաւաքած է երկու կէտ: Կ’արժէ նշել, որ  Ռոնալտօ,  ընթացիկ տարուան «Չեմփիընզ Լիկ»   մրցաշարքի  երեք  հանդիպումներուն ընթացքին  նշանակած է եօթ կոլ:  

Մինչ  Քրիսթիանօ Ռոնալտօ կը  գլխաւորէր սպանական   մարզաթերթերու խորագիրները,  Զլաթան Իպրահիմովիչ դարձաւ  ֆրանսական   մամուլի հերոսը: Արդարեւ,  շուէտացի   յարձակողը նշանակեց՝ Անտերլեխթի դէմ Փարի Սէն Ժերմէնի արձանագրած  5-0 յաղթանակին  չորս կոլերը: Էտինսըն  Գաւանի՝   հինգերորդը:  Ֆրանսական  խումբը   երեք  հանդիպումներէ ետք  ինը կէտով կը գլխաւորէ  Գ. Խմբակը:  Միեւնոյն խմբակին մէջ Օլիմփիաքոս – Պենֆիքա  ճակատումը վերջ գտաւ 1-1  հաւասարութեամբ:

 Իր կարգին, «Չեմփիընզ Լիկ»ի բաժակակիր Պայերն Միւնիխ,  հինգ անպատասխան գնդակ  զետեղեց  չեխական Վիթորիա Փլզէն խումբին  բերդին մէջ:  Ֆրանք Ռիպերի (2), Տաւիտ Ալապա, Պասթիան  Շուայնշթայկըր եւ Մարիօ  Կոցէ նշանակեցին պաւարիական խումբին կոլերը:  Պայերն  Միւնիւխ  նոյնպէս,  երեք   հանդիպումներէ ետք ապահոված է առաւելագոյնը՝ ինը կէտ:  Մանչեսթըր Սիթի  գրաւեց երկրորդ դիրքը, շնորհիւ  Մոսկուայի Բանակայիններուն  դէմ արձանագրած 2-1 յաղթանակին:  Սերժիօ Ակուերօ նշանակեց  անգլիական խումբին զոյգ կոլերը:

Ա. Խմբակին մէջ, Օլտ Թրաֆորտ մարզադաշտին մէջ, Մանչեսթըր Եունայթըտ  1-0 արդիւնքով  պարտութեան մատնեց  Ռէալ Սոսիետատը: Մրցումին միակ կոլը նշանակեց Սոսիետատի  յետսապահ Ինիկօ Մարթինէզը՝ սեփական  բերդին մէջ:  Դարձեալ Ա. Խմբակին մէջ, Պայեր Լեվերքուզեն  4-0 արդիւնքով    փայլուն յաղթանակ մը տարաւ  Տոնեցքի Շախտիորին դէմ:   Սթեֆան  Քիսլինկ (2), Սիմոն  Ռոլֆ եւ  Սիտնէյ  Սամ   նշանակեցին  գերմանական  խումբին կոլերը:

 

Ստորեւ   մրցումներուն  թեքնիք արդիւնքները:

Ա. Խմբակ

Մանչեսթըր Եունայթըտ – Ռէալ Սոսիետատ՝  1-0 

  Պայեր Լեվերքուզեն –   Շախտիոր Տոնեցք՝ 4-0  

Բ.Խմբակ

  Կալաթասարայ  –  Էֆ. Սի. Գոփենհակըն՝ 3-1  

 Ռէալ  Մատրիտ  – Եուվենթուս՝ 2-1  

Գ. Խմբակ

Անտերլեխթ  –  Փարի Սէն Ժերմէն՝ 0-5   

 Պենֆիքա  –  Օլիմփիաքոս՝ 1-1    

Դ. Խմբակ

 Պայերն  Միւնիխ  –  Վիթորիա Փլզէն՝ 5-0   

Մոսկուայի  Բանակայիններ –  Մանչեսթըր Սիթի՝ 1-2     

 

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button