ԹՐԻՓՈԼԻԻ ԿԱՑՈՒԹԻՒՆԸ ԿԸ ՄՆԱՅ ՄՏԱՀՈԳԻՉ

0
22

 Թրիփոլիի ապահովական  իրավիճակը մնաց անփոփոխ:  Հակամարտութեան երկու կողմերը շարունակեցին   տարբեր տեսակի  զէնքերով   բախումները:  Քաղաքի գրեթէ բոլոր  առեւտրական եւ կրթական հաստատութիւնները կը մնան  փակ:  Վերջին քսան չորս ժամերուն  ընթացքին, բախումներուն  հետեւանքով մահացան երկու անձեր: Վիրաւորներուն  թիւը  բարձրագաւ 12-ի:Լիբանանեան բանակը կը  փորձէ   հանդարտեցնել կրակակէտերը:  Բանակը  նաեւ յաճախ կը  հակադարձէ արձակուող  կրակներուն:

Զբօսաշրջութեան նախարարի պաշտօնակատար  Ֆատի Ապուտ բանակէն  պահանջեց անխնայ  հարուածել ապահովական ծրագիրը խանգարողներուն:   Թերթը  մամուլի  յանձնելու պահուն, զգուշաւոր   հանդարտութիւն մը կը  տիրէր  Թրիփոլիի մէջ:

Բանակի  ընդհանուր հրամանատար, զօրավար Ժան Քահուաճի ապահովական  նիստ մը  գումարեց   երէկ կէսօրին եւ  քննարկեց  Թրիփոլիի իրավիճակը:  Լրատուական աղբիւրներ կը  հաղորդեն, թէ բանակը  յառաջիկայ   ժամերուն կարգ մը  վճռական  քայլերու պիտի  դիմէ   Հիւսիսային Լիբանանի մէջ:   Թրիփոլիի եւ հիւսիսային Լիբանանի միւֆթի, շէյխ Մելիք Շաար    ցաւ յայտնեց, որ  7  Մայիսէն ետք, Թրիփոլի  վերածուած է  պայթումներու եւ   ատելութեան  բեմի մը:  Մուսթաքպալ Հոսանքի անդամ, երեսփոխան Սամիր Ճըսր,  ըսաւ, որ քաղաքացիները չեն զգար  խռովարարութիւն կատարողներու դէմ  օրէնքի գործադրութիւն:

Ներքին գործոց նախարար Մարուան Շարպէլ  դիտել  տուաւ, թէ կառավարութիւնը  չի փափաքիր մանրամասնել  Թրիփոլիի ապահովութեան ծրագիրը: Ան բաւարարուեցաւ յայտնելով, թէ   ծրագիրը կ’ընդգրկէ երկու  բաժիններ՝ ապահովական եւ  բարգաւաճական: Շարպէլ  յայտնեց, թէ  ծրագիրը յառաջիկայ  քանի մը  օրերուն ընթացքին պիտի դրուի  գործադրութեան:

LEAVE A REPLY

Please enter your comment!
Please enter your name here