ԱՏՐՊԷՅՃԱՆ ԿԸ ՍՊԱՌՆԱՅ «ԵՈՒՐՕՆԵՍԹ»Ի ՄԷԾ ԳՈՐԾՈՒՆԷՈՒԹԻՒՆԸ ԴԱԴՐԵՑՆԵԼ

0
11

Եւրոմիութեան Արեւելեան գործընկերութեան «Եուրոնեսթ» խորհրդարանական վեհաժողովի՝ Քիեւի մէջ 1 եւ 2  Նոյեմբերին կայանալիք խորհուրդի նիստին ընթացքին, պիտի քննուի վեհաժողովի Ատրպէյճանի պատուիրակութեան գործունէութեան դադրեցման հարցը. այս մասին կը տեղեկացնէ ատրպէյճանական «Էյ.Փի.Էյ.» լրատուական գործակալութիւնը՝ վկայակոչելով Եւրոխորհրդարանի մամլոյ ծառայութիւնը:
Պատուիրակութեան գործունէութիւնը դադրեցնելու համար «Եուրոնեսթ»ի համանախագահներուն դիմած է վեհաժողովի փոխնախագահ Էլհան Սուլէյմանովը՝ դժգոհելով Ատրպէյճանի մէջ այս ամիս կայացած նախագահական ընտրութիւններու քննադատութենէն, որ ընդգրուած էր Եւրոխորհրդարանին կողմէ վաւերացուած բանաձեւին մէջ:
Միաժամանակ, Ատրպէյճան գոհ է Եւրոխորհրդարանի բանաձեւի այն բաժինէն, որ կ՛առնչուի Լեռնային Ղարաբաղի հակամարտութեան եւ ուր, Ատրպէյճանի արտաքին գործոց նախարարութեան խօսնակ Էլման Ապտուլլաեւի համաձայն՝ ցոյց կը տրուի, թէ «միջազգային հանրութիւնը կը սատարէ Ատրպէյճանի արդարացի դիրքորոշման եւ կը ճանչնայ բռնագրաւման փաստը»: Ապտուլլաեւ նշած է նաեւ, թէ Եւրոխորհրդարանի բանաձեւին մէջ առաջին անգամ ըլլալով ընդգծուած է ղարաբաղեան հակամարտութիւնը ՄԱԿ-ի Ապահովութեան Խորհուրդի չորս բանաձեւերուն հիման վրայ կարգաւորելու կարեւորութիւնը:

LEAVE A REPLY

Please enter your comment!
Please enter your name here