ՌՈՄԱ ԱՐՁԱՆԱԳՐԵՑ ԻՆՆԵՐՈՐԴ ՅԱՂԹԱՆԱԿԸ – ՊԱՐՉԵԼՈՆԱ ՅԱՂԹԵՑ ՏԱՐՈՒԱՆ ԱՌԱՋԻՆ ԳԼԱՍԻՔՕ-Ն

0
9

 Շաբաթ երեկոյեան, Սպանիոյ ֆութպոլի ախոյեանութեան  10-րդ հանգրուանի մրցումներուն,  գաթալոնական Նու Գամփ  մարզադաշտին մէջ,  96710   մարզասէրներու ներկայութեան, Պարչելոնայի եւ  Ռէալ  Մատրիտի միջեւ   տեղի ունեցաւ  ընթացիկ եղանակի առաջին  էլ Գլասիքօ-ն:  Հանդիպման 19-րդ վայրկեանին, Պարչելոնայի  պարզիլիացի նորեկ՝   Նէյմար  բացաւ «Էլ Գլասիքօ»ի  հաշիւը, երբ  գրաւեց   Տիէկօ   Լոփեզի բերդը: Առաջին կիսախաղը՝  1-0   Պարչելոնայի  առաւելութեամբ  աւարտելէ ետք, գաթալոնական  խումբը  երկրորդ  կիսախաղին ցուցադրեց սպասողական խաղ: Ռէալի  յարձակումները հետզհետէ աւելի   վտանգաւոր սկսան դառնալ:Սակայն   հանդիպման  79-րդ վայրկեանին,  Ալեքսիս Սանչես  գեղեցիկ կոլով մը  կրկնապատկեց  Պարչելոնայի առաւելութիւնը:  Մրցումի  90-րդ  վայրկեանին  Ճեսէ Ռոտրիկէզ    կրճատեց  հաշիւը: Մրցումը  վերջ  գտաւ Պարչելոնայի յաղթանակով՝   2-1:   Շնորհիւ այս  յաղթանակին, Պարչելոնա՝  28   կէտով  կը գլխաւորէ ախոյեանութեան  ընդհանուր  դասաւորումը:   Աթլեթիքօ Մատրիտ յաջողեցաւ… Ռէալ  Մատրիտ՝  22 կէտով կը մնայ  երրորդ դիրքի վրայ:  Մրցումէն  ետք,  Ռէալի  խմբապետ  Սերժիօ Ռամոս  յայտարարեց, թէ իրաւարարը երկու անգամ փենալթի հարուած  զլացած էր Ռէալին:  Իսկ Ալեքսիս Սանչես  յայտնեց, թէ  Պարչելոնայի խաղը  գոհացուցիչ չէր:   Պէտք է  ըսել, որ  Պարչելոնայի  աստղը՝ Լիոնէլ Մեսի ունեցաւ համեմատաբար համեստ խաղ  մը:  Այսուհանդերձ,  գաթալոնական խումբը  սեփական դաշտի մէջ արձանագրեց  յաջորդական  20-րդ  յաղթանակը: Միւս  կողմէ,  Աթլեթիքօ Մատրիտ, սեփական դաշտին մէջ  5-0 արդիւնքով պարտութեան մատնեց  Ռէալ Պեթիսը:   Տաւիտ Վիալ(2), Տիէկօ Գոսթա,  Օլիվիյէ  Թորէս եւ   Կապի   Ֆեռնանտես  նշանակեցին  մատրիտեան խումբին   կոլերը:

ԴԱՍԱՒՈՐՈՒՄ

1-      Պարչելոնա՝   10 մրց.  28 կէտ

2-      Աթլեթիքօ Մատրիտ՝  10  մրց.  27  կէտ

3-      Ռէալ Մատրիտ՝  10  մրց.  22 կէտ

 

Անգլիոյ  ֆութպոլի  ախոյեանութեան 9-րդ   հանգրուանի   հանդիպումներուն,  Արսենալ, մրցակիցի դաշտին մէջ   2-0 արդիւնքով պարտութեան մատնեց Գրիսթալ  Փալասը եւ ամրապնդեց  ընդհանուր  դասաւորման մէջ  գրաւած պարագլուխի դիրքը:    Միկէլ Աէքեթա  եւ  Օլիվիյէ  Ժիրու նշանակեցին «Կանըրզ»ներուն կոլերը:  Էնֆիլտ Ռոտ մարզադաշտին մէջ,  Լիվըրփուլ 4-1 արդիւնքով  պարտութեան մատնեց  Ուեսթ Պրոմուիչ Ալպիոնը:  Լիվըրփուլի  ուրուկուէյցի  յարձակող Լուիս Սուարէզ   նշանակեց   հեթ-թրիք  մը,  (3 կոլ):  Տին Սթարիճ՝  չորրորդ կոլը:  Սուարէզ՝  չորրորդ   հեթ-թրիքը կը նշանակէր Լիվըրփուլի  շապիկով, սակայն առաջինը՝  Էնֆիլտ Ռոտի  մէջ:   Օլտ թրեֆորտ  մարզադաշտին մէջ, Մանչեսթըր Եունայթըտ  3-2   արդիւնքով պարտութեան մատնեց  Սթոք Սիթին:  Ռոպին Վան  Փըրսի,  Ուէյն  Ռունի եւ   Խաւիէ Հերնանտէզ նշանակեցին « Կարմիր Սատանաներ»ուն կոլերը:  Ասթոն Վիլա –  Էվըրթըն   հանդիպումին սկիզբը,  հանդիսաւորապէս  նշուեցաւ Անգլիոյ Ֆութպոլի ֆետարասիոնի  հիմնադրութեան   150 ամեակը:  Մրցումը վերջ գտաւ  Էվըրթընի  յաղթանակով՝2-0 :   Լոնտոնի մէջ, Չելսի   ընդունեց  Մանչեսթըր Սիթին եւ  2-1  արդիւնքով պարտութեան  մատնեց իր մրցակիցը:  Անտրէ  Շուրլէ եւ  Ֆեռնանտօ Թորէզ  նշանակեցին «Կապոյտներ»ուն կոլերը,  Աերժիօ Ակուերօ՝ Սիթիի:   Սանտերլանտ՝ նոր մարզիչ  Կիւսթավ Փոյէի  գլխաւորութեամբ 2-1  արդիւնքով պարտութեան մատնեց  Նիուքասլ Եունայթըտը:

ԴԱՍԱՒՈՐՈՒՄ

1-     Արսենալ՝   9  մրց.  22 կէտ

2-      Չելսի՝  9  մրց.  20 կէտ

3-     Լիվըրփուլ՝ 9  մրց.  20 կէտ

 Գերմանիոյ  ախոյեանութեան  10-րդ   հանգրուանի մրցումներուն,  Պորուսիա  Տորթմունտ   3-1 արդիւնքով պարտութեան մատնեց    Շալքէ  04-ը:     Օպամեյանկ,  Շահին եւ  Պլաշչիքովսքի   նշանակեցին  Տորթմունտի կոլերը:   Իր  կարգին, Պայերն Միւնիխ  3-2  արդիւնքով պարտութեան մատնեց Հերթա Պերլինը: Մանչուկիչ (2 )  եւ Կէոցէ նշանակեցին  Պայերնի կոլերը:  Պայեր  Լեվերքուզեն 2-1  արդիւնքով  պարտութեան մատնեց  Աուկսպուրկը:

 Պայերն Միւնիխ խումբի պատուաւոր    նախագահ    Ֆրանց Պեքընփաուր  յայտարարեց, թէ   Փարի Սէն Ժերմէնի  յարձակող Զլաթան Իպրահիմովիչ կը ցուցադրէ  ինքնավստահ խաղ եւ կը նշանակէ գեղեցիկ  կոլեր:  Պեքընփաուր   դիտել տուաւ, որ  եւրոպական ֆութպոլի «Ոսկէ Գնդակ» մրցանակին  գլխաւոր  թեկնածուն  Ֆրանք  Ռիպերին ըլլալով հանդերձ,  պիտի  չզարմանայ եթէ  տիտիղոսը  շնորհուի Իպրահիմովիչին: «Ոսկէ Գնդակ»   մրցանակին  համար կը պայքարին  երեսուն երեք  ֆութպոլիստներ:  Մրցանակակիրին անունը պիտի յայտարարուի 14  Յունուար  2014-ին:

ԳԵՐՄԱՆԻԱ

1-     Պայերն  Միւնիխ   10  մրց.  26 կէտ

2-      Պորուսիա Տորթմունտ՝  10   մրց.  25 կէտ

3-     Պայեր Լեվերքուզեն՝  10  մրց. 25  կէտ

Իտալիոյ  ախոյեանութեան 9-րդ  հանգրուանի  մրցումներուն, Ինթէր Միլան  մրցակիցի  դաշտին մէջ  4-2 արդիւնքով պարտութեան մատնեց Վերոնան: Եուվենթուս  երկու անպատասխան գնդակ  զետեղեց  Ճենովայի  բերդին մէջ:  Արթուրօ Վիտալ եւ   Գարլոս Թեւէզ նշանակեցին Եուվէ-ի կոլերը:   Ա.Սէ. Միլան 3-2 արդիւնքով  պարտուեցաւ  Փարմայէն:  Ռոմա արձանագրեց  յաջորդական  իններորդ   յաղթանակը երբ  մրցակիցի  դաշտին  մէջ  1-0  արդիւնքով պարտութեան մատնեց Ուտինեզէն:  Հիկուայինի   «տուպլէ»ին շնորհիւ, Նափոլի  2-0  արդիւնքով պարտութեան մատնեց  Թորինօն:

ԴԱՍԱՒՈՐՈՒՄ

1-      Ռոմա՝  9  մրցում   27 կէտ

2-      Նափոլի՝   9  մրց.  22 կէտ

3-      Եուվենթուս՝  9  մրց.  22 կէտ

Ֆրանսայի ախոյեանութեան  10-րդ  հանգրուանի մրցումներուն,   Մոնաքօ՝  2-1  արդիւնքով պարտութեան մատնեց  Լիոնը:   Մունիր Օպաթի եւ Ռատամէլ Ֆալքաօ նշանակեցին Մոնաքոյի կոլերը:

Ռուսիոյ ախոյեանութեան  14-րդ հանգրուանի  մրցումներուն,  Սան Փեթերսպուրկի    Զենիթիը մրցակիցի  դաշտի մէջ   2-1 արդիւնքով պարտութեան  մատնեց  Ուրալը:  Մոսկուայի Սպարտակը 2-0 արդիւնքով  պարտութեան մատնեց Ռոստովը:  Եուրա  Մովսիսեան եւ  Թինօ  Գոսթա  նշանակեցին  սպարտակցիներուն կոլերը:   Սպարտակ  ներկայիս  30  կէտով կը գրաւէ ընդհանուր դասաւորման  երկրորդ դիրքը: Նոյնքան՝ 30   կէտ ունի  նաեւ  Լոքոմոթիվ Մոսկուան:  Վերջինս  2-1 արդիւնքով  պարտութեան  մատնեց Կազանը:  Զենիթ՝  35  կէտով, կը գտնուի առաջին դիրքի վրայ:

Հայաստանի ախոյեանութեան 10-րդ   հանգրուանի մրցումներուն, Բանանց 1-0  արդիւնքով  պարտութեան  մատնեց  Շիրակը:  Փիւնիկ՝  5-0  յաղթեց  ալաղկերտին, իս Արարատ՝  2-0  յաղթեց  Ուլիսին:  Երեւանի Արարատը   20   կէտով կը գլխաւորէ  ընդհանուր դասաւորումը:   Փիւնիկ՝ 16  կէտով կը գտնուի  երկրորդ  դիրքի վրայ:

Արժանթինի ֆութպոլի ախոյեանութեան Արսենալ  Սարանթի –  Կիմնազիա  հանդիպումը  աւարտեցաւ զանգուածային  ծեծկռտուքով: Ծեծկռտուքը  վերջ գտաւ ոստիկանութեան միջամտութեամբ:  Հինգ ֆութպոլիստներ ստացան կարմիր  տոմս:  Մրցումը  աւարտեցաւ 1-1  հաւասարութեամբ:

LEAVE A REPLY

Please enter your comment!
Please enter your name here