ԱԼԻԵՒ – ՍԱՐԳՍԵԱՆ ՀԱՆԴԻՊՈՒՄԻ ՆԱԽԱՊԱՏՐԱՍՏՈՒԹԻՒՆՆԵՐ

0
30

Ըստ ատրպէյճանական «Թուրան» լրատուական գործակալութեան՝ Պաքուի մօտ Միացեալ Նահանգներու դեսպան Ռիչըրտ Մորնինկսթար յայտարարած  է «Յոյս ունինք, որ մինչեւ տարեվերջ տեղի կ՛ունենայ Հայաստանի եւ Ատրպէյճանի նախագահներու հանդիպումը»:
Ըստ դեսպանին՝ ԵԱՀԿի Մինսքի խմբակի նորանշանակ ամերիկացի համանախագահ Ճէյմս Ուորլիք առաջադրած է նոր մօտեցումներ, որոնք հնարաւորութիւն ստեղծած են արագացնելու Արցախի տագնապի կարգաւորման գործընթացը: Ուորլիք այդ մօտեցումները ներկայացուցած է Ատրպէյճանի նախագահին եւ արտաքին գործոց նախարարին հետ իր վերջին հանդիպման ընթացքին, որուն ներկայ եղած էր նաեւ դեսպանը:
Միւս կողմէ, Ատրպէյճանի նախագահ Իլհամ Ալիեւ հանդիպում մը ունեցաւ Եւրոպական Միութեան Հարաւային Կովկասի հարցերով յատուկ ներկայացուցիչ Ֆիլիփ Լըֆորի հետ, որուն հետ քննարկեց  Ատրպէյճան-Եւրոմիութիւն համագործակցութեան, հայ-ատրպէյճանական յարաբերութեանց եւ ղարաբաղեան հակամարտութեան կարգաւորման վերաբերեալ  հարցեր:

 

LEAVE A REPLY

Please enter your comment!
Please enter your name here