ԱՄԵՆԱՅՆ ՀԱՅՈՑ ԿԱԹՈՂԻԿՈՍԸ ԿԸ ՄԱՍՆԱԿՑԻ ԵԿԵՂԵՑԻՆԵՐՈՒ ՀԱՄԱՇԽԱՐՀԱՅԻՆ ԽՈՐՀՈՒՐԴԻ ՀԱՄԱԳՈՒՄԱՐԻՆ

0
25

Ամենայն հայոց Գարեգին Բ. կաթողիկոսին գլխաւորած պատուիրակութիւնը պիտի  մասնակցի Հարաւային Քորէայի   Պուսան  քաղաքին մէջ վաղը՝  Չորեքշաբթի,՝ 30 Հոկտեմբերին  կայանալիք Եկեղեցիներու Համաշխարհային խորհուրդի 10-րդ համագումարին: Համագումարը  պիտի աւարտի  8  Նոյեմբերին:
Կաթողիկոսութեան պատուիրակութեան մաս կը կազմեն Պոլսոյ Հայոց պատրիարքական փոխանորդ Արամ արք. Աթէշեանը, Վիգէն արք. Այքազեանը (Միացեալ Նահանգներու Արեւելեան թեմ), Շիրակի թեմի առաջնորդ Միքայէլ եպս. Աջապահեանը, Մայր Աթոռի Եկեղեցական հայեցակարգային հիմնադրոյթներու գրասենեակի տնօրէն Բագրատ եպս. Գալստանեանը, Դամասկոսի հայոց թեմի առաջնորդ Արմաշ եպս. Նալբանտեանը, Մայր Աթոռի Միջեկեղեցական յարաբերութիւններու բաժինի տնօրէն Յովակիմ եպս. Մանուկեանը, Աւստրալիոյ հայոց թեմի առաջնորդ Հայկազուն եպս. Նաճարեանը, Երուսաղէմի Ս. Յակոբեանց վանքի միաբան Բագրատ վրդ. Պուրճեկեանը, վեհափառ հայրապետի գաւազանակիր Աղան աբեղայ Երնջակեանը, Մայր աթոռի բարերար Գաբրիէլ Չեմպերճեանը, Հայաստանեան «Կլոր Սեղան» միջեկեղեցական բարեգործական հիմնարկի տնօրէն դոկտ. Կարէն Նազարեանը, Մայր աթոռի Համացանցային ծառայութիւններու գրասենեակի տնօրէն Փոլա Տէր Մաթոյեանը, Միջեկեղեցական յարաբերութիւններու բաժինի աշխատակից Գոհար Ղալաչեանը, Լոզանի համալսարանէն Անի Ղազարեանը:
«Կեանքի Աստուած, առաջնորդիր մեզ դէպի խաղաղութիւն եւ արդարութիւն» խորագիրը կրող համաժողովի բացման հանդիսաւոր արարողութիւնը տեղի պիտի ունենայ Պուսանի ցուցահանդէսներու սրահին մէջ, ուր համաժողովի 4000 մասնակիցներուն իր պատգամը պիտի յղէ Ամենայն հայոց կաթողիկոսը: Համաժողովին պիտի մասնակցին 150 երկիրներէ շուրջ 360 եկեղեցիներու ներկայացուցիչներ, եկեղեցւոյ պետեր, բարձրաստիճան պաշտօնեաներ, հասարակական գործիչներ: Համաժողովին ընթացքին Ամենայն հայոց կաթողիկոսը առանձին հանդիպումներ պիտի ունենայ տարբեր եկեղեցիներու առաջնորդներու եւ ԵՀԽ պաշտօնեաներու հետ:

 

LEAVE A REPLY

Please enter your comment!
Please enter your name here