ՆԱԼՊԱՆՏԵԱՆ ՔՆՆԱԴԱՏԵՑ ԱՐՑԱԽԻ ՎԵՐԱԲԵՐԵԱԼ ԵՒՐՈԽՈՐՀՐԴԱՐԱՆԻ ԲԱՆԱՁԵՒԸ

Հայաստանի արտաքին գործոց նախարար Էտուարտ Նալպանտեան ընդունեց  Հայաստան-Եւրոմիութիւն խորհրդարանական համագործակցութեան խորհուրդի համանախագահ, Եւրոխորհրդարանի պատգամաւոր Միլան Ցապրնոխը: Նախարար Նալպանտեան կարեւոր նկատած է Եւրոմիութեան հետ յարաբերութիւններու հետագայ զարգացումը եւ ամրապնդումը, որուն մէջ նշանակալի դերակատարութիւն ունի միջխորհրդարանական փոխգործակցութիւնը: Հանդիպման ընթացքին քննարկուած է նախորդ շաբաթ Եւրոխորհրդարանին մէջ Եւրոպայի հարեւանութեան քաղաքականութեան գծով ընդունուած բանաձեւը: Այս պարունակին մէջ Էտուարտ Նալպանտեան նշած է, որ փաստաթուղթին մէջ Լեռնային Ղարաբաղի հիմնախնդիրին վերաբերեալ ձեւակերպումները կը հակասեն Եւրոպական Միութեան պաշտօնական դիրքորոշման, ինչպէս նաեւ հիմնախնդիրի կարգաւորման գործընթացին մէջ միջնորդական առաքելութեան միջազգային կշիռ ունեցող ԵԱՀԿ Մինսքի խումբի համանախագահներուն մօտեցումներուն:
Նախարարը աւելցուցած է, որ նման ձեւակերպումներու հեղինակները պէտք է գիտակցին, որ պատասխանատուութիւն կը կրեն կարգաւորման գործընթացին վրայ ատոնց ունենալիք բացասական ազդեցութեան եւ եռանախագահներու՝ հիմնախնդիրի խաղաղ կարգաւորման ուղղուած ջանքերուն վնասելու համար:
Զրոյցին ընթացքին անդրադարձ կատարուած է խորհրդարանական մակարդակով փոխգործակցութեան հետագայ ծրագիրներուն եւ իրականացուելիք քայլերուն:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button