ԼԻԲԱՆԱՆԵԱՆ ԿԱՐՃ ԼՈՒՐԵՐ

0
36

 

–         Մուսթաքպալ Հոսանքի  անդամ, երեսփոխան  Ժան Օղասապեան  յայտնեց,թէ   9-9-6 տարազով  կառավարութեան  Հըզպալլայի պահանջը  վերջնականապէս  փակած է  նոր կառավարութիւն կազմելու  ճիգերը: Օղասապեան նշեց, թէ Հըզպալլա յաջորդաբար  կը  քայքայէ  սահմանադրական կառոյցները, որպէսզի    քաղաքական նոր վարչաձեւ պարտադրէ լիբանանցիներուն:

 –         Ընդհանուր անվտանգութեան  ընդհանուր  պետ,  հազարապետ Ապպաս Իպրահիմ  հաւաստեց, թէ Հալէպի  մէջ առեւանգուած երկու    հոգեւորականները ազատ արձակելու  բանակցութիւնները  կը շարունակուին: Իպրահիմ  նշեց, թէ այս   հարցին  վերաբերեալ  Քաթարի  Թամիմ Պըն Համատ Ալ Թանի   իշխանը  բանակցութիւններ կը վրայ առնչակից   կողմերու հետ:

–         Հզպալլայի եւ Ընկերվար Յառաջդիմական Կուսակցութեան միջեւ  փոխյարաբերութիւնները  ամրապնդելու  ծիրին մէջ  հանդիպում մը նախատեսուած է  Ուալիտ Ճոմպլաթի եւ  Հըզպալլայի պատասխանատուներէն Ուաֆիք Սաֆայի  միջեւ: Հանդիպման  կրնան մասնակցիլ    կողմերը  ներկայացնող  նախարարներ:

–         Ընկերվար  Յառաջդիմական Կուսակցութեան պետ Ուալիտ Ճոմպլաթ յառաջիկայ  Երեքշաբթի  երեկոյեան,  հեռատեսիլային  հաղորդումի մը  ընթացքին պիտի  բացատրէ  կառավարութեան՝  9-9-6  տարազին  կառչած մնալու իր  պատճառները,  ինչպէս նաեւ՝  «Ժընեւ-2» խորհրդաժողովին նախօրէին, Սուրիոյ  հակամարտութեան վերաբերեալ իր տեսակէտը:

–         Երէկ   առաւօտեան  Լիբանան ընդունեց  Ինտոնեզիոյ  մատոյցներուն մէջ  նաւաբեկումի հետեւանքով  խեղդամահ դարձած  երեսուն չորս  լիբանանցիներուն  անկենդան  մարմինները: Օժանդակութեան   Գերագոյն Խորհուրդի ընդհանուր   քարտուղար Իպրահիմ Պեշիր յայտարարեց, թէ  զոհուած   35  լիբանանցիներուն 34-ին դիակները ստանելէ ետք թղթածրարը կը  նկատուի փակուած, իսկ  35-րդ զոհը՝  նորածին մը   ըլլալով , անկարելի եղած է  դիակներուն մէջէն զանազանել անոր մարմինը:

–          Լիբանանի մօտ  Ռուսիոյ  դեսպան Ալեքսանտր Զասփիքին այցելեց արտաքին գործոց նախարարի պաշտօնակատար  Ատնան Մանսուրին:  Հանդիպումէն ետք  դեսպանը  յայտարարեց, թէ  «Ժընեւ-2» խորհրդաժողովին թուականը պիտի  որոշէ ՄԱԿ- Ռուսիա-Միացեալ Նահանգներ  միացեալ հանդիպումը:

–         Խորհրդարանական  արդարադատութեան եւ  վարչական հարցերու  յանձնախումբի  պետ Ռոպեր Ղանէմ նշեց, թէ  որեւէ նորութիւն չկայ ընտրական  նոր  օրինագիծին  վերաբերեալ:  Ղանէմ  աւելցուց, թէ   ճիշդ այդ նպատակով կազմած է  ուսումնասիրութիւն կատարող  ենթայանձնախումբ  մը:

–          Տեղեկատուութեան նախարարի պաշտօնակատար  Ուալիտ Տաուաք իր գրասենեակին մէջ ընդունեց Լիբանանի համար  կազմուած Միջազգային Ատեանի փոխ  նախագահ,դատախազ Ռալֆ Ռիաշին, ինչպէս նաեւ բաժնի վարիչ Անթոնի Լէյճը եւ քննարկեց Ատեանին վերաբերող հարցեր:

–         Արաբ դեմոկրատական Կուսակցութեան պետ, նախկին երեսփոխան Ալի  Իյտ  մերժեց   ներկայանալ Թրիփոլիի  երկու  մզկիթներուն  պայթումին կապակցութեամբ    հարցաքննութեան:

–         Խորհրդարանի նախագահ Նեպիհ Պըրրի  ընդունեց Լիբանանի մօտ Միացեալ Նահանգներու դեսպան Տէյվիտ Հէյլը եւանոր հետ քննարկեց շրջանային  բեմի  վերջին իրադարձութիւնները:  Պըրրի նաեւ  ընդունեց  Սենեկալի դեսպանը:

 

 

LEAVE A REPLY

Please enter your comment!
Please enter your name here