ՌՈՒՍԱԿԱՆ ՌԱԶՄԱԿԱՆ ԽԱՐԻՍԽԸ ԿՐՆԱՅ ՄԻՋԱՄՏԵԼ ԱԶԵՐԻԱԿԱՆ ՍԱԴՐԱՆՔԻ ՄԸ ՊԱՐԱԳԱՅԻՆ

0
23

Հայաստանի մէջ տեղակայուած ռուսական 102րդ ռազմակայանի զօրախումբի հրամանատար գնդապետ Անտրէյ Ռուզինսքին յայտարարեց, որ Լեռնային Ղարաբաղի դէմ Ատրպէյճանի յարձակման պարագային՝ ռուսական ռազմական խարիսխը կրնայ ներգրաւուիլ ռազմական գործողութիւններուն մէջ: «Կրասնայա Զվեզտա» թերթին մէջ հրատարակուած հարցազրոյցին մէջ՝ անդրադառնալով ռազմակայանի պատասխանատուութեան գօտիի ռազմաքաղաքական իրադրութեան՝ Ռուզինսքին նշած է, որ անիկա կը մնայ անհանգիստ՝ մեկնելով կարգ մը ապակայունացնող գործօններէ, որոնք կապուած են հայ-ատրպէյճանական հակամարտութեան պատճառով տարածաշրջանին մէջ կացութեան լարուածութեան կարելիութեան:
«Ատրպէյճանի ղեկավարութեան կողմէ Լեռնային Ղարաբաղի նկատմամբ իրաւասութիւնը ուժի ճամբով վերականգնելու վերաբերեալ որոշում տալու պարագային ռազմակայանը, Հաւաքական անվտանգութեան պայ-մանագիրի կազմակերպութեան ծիրին մէջ Ռուսիոյ պայմանագրային պարտաւորութիւններուն համապատասխան, կրնայ միջամտել ռազմական հակամարտութեան», դիտել տուած է Ռուզինսքի:
Ան անդրադարձած է ռազմական խարիսխին մէջ առկայ կարողականութեան եւ զինամթերքին։ «Ուժերու այս թիւը թոյլ  կու տայ յաջողութեամբ կատարելու զօրախումբին առջեւ դրուած պարտականութիւնները», յայտնած է ան։

 

LEAVE A REPLY

Please enter your comment!
Please enter your name here