«Այսօր Արդէն Գրախանութ Պահելը Մարտիրոսութիւն Չէ՝ Նահատակութիւն Է»

0
41

«Ես այսօր այստեղ եմ բազմաթիւ գրողների, գրականագէտների անունից՝ ասելու, որ մենք կանգնելու ենք գրավաճառների ու հրատարակիչների կողքին եւ պայքարի բոլոր հնարաւոր ձեւերով փորձելու ենք ամէն ինչ անել, որպէսզի թոյլ չտանք այս որոշման  կիրառումը, որովհետեւ եթէ մեր իշխանութիւնները հասարակ բան չեն գիտակցում, որ չի կարելի գիրքը թանկացնել, ու դրա համար բացատրութիւններ պէտք չեն, ինչպէս պէտք չեն բացատրութիւններ նրա համար, թէ ինչի չի կարելի ծառ կտրել, ինչի չի կարելի կրակի հետ խաղալ կամ հայրենիք դաւաճանել: Այս դէպքում մենք ստիպուած ենք այլ միջոցներով հասկացնել», «Ուրբաթ» մամլոյ ակումբին մէջ լրագրողներուն հետ ունեցած զրոյցին ընթացքին «Հսկիչ դրամարկղային մեքենաների կիրառման մասին» կառավարութեան նոր որոշման վերաբերեալ իր մտահոգութիւնը յայտնեց գրող, գրականագէտ Յովիկ Չարխչեանը՝ նշելով, որ նոր ՀԴՄներու կիրարկման պարագային գիրքերը շուրջ 1000 դրամով պիտի սղին:
«Անտարես» գրահրատարակչութեան տնօրէն Արմէն Մարտիրոսեանի համաձայն, անհեթեթ է կառավարութեան որոշումը, քանի որ կառավարութիւնը շուրջ 12 էջի վրայ միայն կը բնութագրէ նոր ՀԴՄի չափորոշիչները, մակնիշը եւ կը սահմանէ գինը՝ 369 հազար 600 դրամ: Մինչդեռ, Մարտիրոսեանի համաձայն, կառավարութեան կողմէ յստակացած չափանիշներով այլ մակնիշի ՀԴՄներ կարելի է ձեռք բերելու աւելի աժան գիներով:
«3000 դրամ էլ պէտք է վճարենք, որպէսզի  սպասարկեն, մինչդեռ եթէ պետութեանը պէտք է այդ վերահսկողութիւնը, թող ինքը միջոցներն ձեռնարկի, օգնի, կամ ուզում է, որ գործարարները անեն դա, թող այնպիսի գին սահմանի, որ ի վիճակի լինեն գնելու: Ճիշդ է, հարկային տեսչութիւնը պէտք է կարողանայ տոտալ (ամբողջական) վերահսկել, որպէսզի մեր տնտեսութեան այդ 60 տոկոս «մոխրագոյնը», «սեւը», որ ասում են, դուրս գայ ջրի երես, բայց ոչ այս ձեւով: Չէ որ փոքրիկ գրախանութներ էին բացւում Երեւանում վերջին մէկուկէս տարում, որոնց տարեկան շահոյթը մէկուկէս տարում կազմում է 200ից 400 հազար, ստացւում է ամբողջ ընտանիքով  աշխատում էին, որովհետեւ հիմնականում ընտանեկան բիզնեսներ էին դրանք, որպէսզի այս սարքը գնէին», յայտնած է Մարտիրոսեան:
Կառավարութեան որոշումը, որ ուժի մէջ մտած է 1 Նոյեմբերէն, կ՛անհանգստացնէ նաեւ «Հայ գիրք» գրախանութներու ցանցի տնօրէնը. «Այսօր 3 գրախանութ ունենք ու պատկերացրէք երեքից իւրաքանչիւրի համար մենք գնում ենք այս սարքը: Այսօր ամէն ինչ արւում է էնտուզիազմի վրայ: Այսօր արդէն գրախանութ բացելը մեծ ռիսկի գործ է, ծայրայեղ ռիսկի: Պէտք է գիրքը թանկացնենք առաջին հայեացքից, բայց դա էլ ելք չէ վերջնական, որովհետեւ եթէ գրքերի գները թանկացնենք, առանց այդ էլ սոցիալական անապահովութիւնը խանգարում է մարդկանց վճարողունակութեանը, 1000 դրամով էլ եթէ թանկացնենք, հարցի լուծում չի լինի, ստիպուած պէտք է լինենք գրախանութների փակման առաջ կանգնել, որովհետեւ չենք պատրաստւում աշխատել միայն ինչ-որ ՀԴՄ առնելու համար: Եւ բացի այդ երաշխաւորուած չենք, որ մի քանի ամիս յետոյ ինչ-որ նմանատիպ այլ որոշում չի լինի: Այսօր գրախանութ պահելը մարտիրոսութիւն չէ՝ նահատակութիւն է», յայտարարեց Աշոտ Գաբրիէլեանը:

 

LEAVE A REPLY

Please enter your comment!
Please enter your name here