ԹՈՒՐՔԻԱ ՔԱՂԱՔԱԿԱՆ ԲԱՒԱՐԱՐ ԼԾԱԿՆԵՐ ՉՈՒՆԻ ՄԻՋԻՆ ԱՐԵՒԵԼՔԻ ՄԷՋ

0
49

Ամերիկեան Երկկուսակցական քաղաքական կեդրոնին հրապարակած զեկուցումին մէջ նշուած է, որ Թուրքիա Միջին Արեւելքի իրադարձութիւններուն վրայ ազդելու շատ քիչ քաղաքական ուժ եւ լծակ ունի:
72 էջերէ բաղկացած «Հռետորաբանութենէն իրականութիւն. Միացեալ Նահանգներու թրքական քաղաքականութեան վերաձեւաւորումը» խորագիրով զեկուցումին մէջ կարեւոր նշանակութիւն կը տրուի Թուրքիոյ նկատմամբ Միացեալ Նահանգներու վերաբերումի ակնյայտ փոփոխութեան:
«Դրացիներու հետ «զերօ խնդիրներ»ու քաղաքականութիւնը որդեգրելու մասին յայտարարելէ ետք, Թուրքիոյ համար աւելի շատ խնդիրներ ծագած են: Թուրքիա ուզեց, որ Սուրիոյ նախագահ Ասատը հեռացուի: Չճանչցաւ Եգիպտոսի նոր կառավարութիւնը, Իսրայէլի հետ խզեց դիւանագիտական յարաբերութիւնները, զայրացուց Իրանը՝ իր տարածքին մէջ տեղադրելով ՆԱԹՕի հակաօդային հրթիռներ եւ աջակցելով Սուրիոյ մէջ ապստամբութեան, վէճի բռնուեցաւ Պաղտատի կեդրոնական կառավարութեան հետ, ջղայնացուց Ծոցի երկիրները՝ պաշտպանելով «Իսլամ եղբայրները», սպանութիւններով, անհիմն մեղադրանքներով ու դաւադրական տեսութիւններով իրմէ հեռացուց Եւրոպան», կը նշուի զեկուցումին մէջ:
Զեկուցումին մէջ գրուած է նաեւ, որ Թուրքիոյ իշխող Արդարութիւն եւ բարգաւաճում կուսակցութիւնը այլեւս անպարտելի չէ: «18 ամիսներու ընթացքին յաջորդաբար կատարուելիք երեք ընտրութիւնները շրջադարձային իրավիճակ պիտի ստեղծեն Թուրքիոյ մէջ: Անգարա յայտնուած է միջինարեւելեան իրադարձութիւններու վրայ ազդելու շատ քիչ քաղաքական լծակներ ունեցողի վիճակին մէջ: Իր ներքին խնդիրները փոխզիջումներու եւ համագործակցութեան միջոցով լուծելու փոխարէն, Արդարութիւն եւ բարգաւաճում կուսակցութիւնը ընտրած է կրօնական մոլեռանդութիւնը եւ հռետորաբանութիւնը», կը նշուի զեկուցումին մէջ:

 

LEAVE A REPLY

Please enter your comment!
Please enter your name here