ՍԱԼԱՄ ՊԱՏՐԱՍՏ ԵՄ ՀՐԱԺԱՐԵԼՈՒ՝ ԵԹԷ ՔԱՅԼՍ ԼՈՒԾԷ ԿԱՌԱՎԱՐՈՒԹԵԱՆ ՏԱԳՆԱՊԸ

0
30

 Հանրապետութեան նախագահ Միշէլ Սըլէյման  Պաապտայի  պալատին մէջ ընդունեց  նորանշանակ վարչապետ Թամամ Սալամը եւ անոր հետ քննարկեց  նոր    կառավարութիւն կազմելու  աշխատանքներուն  ընթացքը: Հանդիպումէն ետք, Սալամ յայտարարեց, թէ  լաւագոյն տարազով  կառավարութիւն կազմելու  նախանձախնդրութիւնը կը մղէ  յաւելեալ սպասումի եւ  համբերութեան:  Սալամ  նաեւ նշեց,թէ պատրաստ է  հրաժարելու, եթէ   համոզուած ըլլար, որ  իր  քայլով կրնար լուծուիլ կառավարութեան տագնապը:

Արաբական  Ծոցի  օրաթերթերը  վերստին կ’արծարծեն  լիբանանեան նոր կառավարութեան կազմութեան թղթածրարը:  Անոնց կարծիքով,  նախագահ Միշէլ Սըլէյմանի կողմէ  Ռիատ այցելութիւն մը  կրնայ  անկիւնադարձաին նշանակութիւն ունենալ  կազմութեան   ճիգերուն վրայ:  Քաղաքական  մեկնաբաններ դիտել կու տան,  թէ  Սալամ  լաւապէս կ’ըմբռնէ  Հըզպալլայի եւ  Մուսթաքպալ Հոսանքի բանեցուցած   ճնշումները: Արաբական Ծոցի   օրաթերթեր կը նշեն,  թէ  Ճոն Քերրիի եւ  իշխան Սաուտ Ֆայսալի  հանդիպման  ընթացքին  քննարկուած է լիբանանեան կառավարութեան հարցը: 

Ընկերվար  Կուսակցութեան պետ  Ուալիտ Ճոմպլաթ  վերահաստատեց  9-9-6 տարազով կառավարութեան մը  իր կեցուածքը:  Ճոմպլաթ  մերժեց մասնակցիլ « Երեք Ութ»երու  տարազով  որեւէ կառավարութեան:

Ներքին գործոց նախարարի  գործակատար Մարուան Շարպէլ  արգիլեց  Ճապալ  Մըհսենէն դէպի  Թրիփոլի՝ բոլոր տեսակի հաւաքները: Ապահովական, իրաւապահ   մարմիններ լրջօրէն կը հետապնդեն նախկին  երեսփոխան Ալի Իյտի  քայլերը:  Վերջինս կը մերժէ՝  Թրիփոլիի « Սալամ» եւ «Թաքուա»  մզկիթներուն առջեւ պատահած    պայթումներուն առնչութեամբ  հարցաքննութեան  հրաւէրը:  Իյտ միաժամանակ  կ’ամբաստանուի  յանցագործներ պաշտպանելու եւ  անոնց   փախուստի  ճանապարհներ  ապահովելու  յանցանքով:

Միւս կողմէ,  Հիւսիսային Լիբանանի  կառավարիչ Նասիֆ Ղալուշ կտրականապէս  մերժեց՝ Ուբաթ  օր,   Նուր հրապարակին  վրայ   նամազ ընելու Իյտի  դիմումը:  Ընդհանուր անվտանգութեան  ընդհանուր տնօրէն հազարապետ Ապպաս Իպրահիմ՝ Իյտը  ձերբակալելու  ցուցմունք տուած է ապահովական մարմիններուն,  եթէ   վերջինս փորձէ  փախուստ տալ Սուրիոյ  ուղղութեամբ:

Երեսփոխան Ահմէտ Ֆաթֆաթ յայտնեց, թէ  հաշտութիւն  անկարելի է գոյացնել  Ճապալ Մըհսէնի հետ, մինչեւ որ  Ալի Իյտ անձնատուր դառնայ  ապահովական կառոյցներուն:

LEAVE A REPLY

Please enter your comment!
Please enter your name here