ՍԸԼԷՅՄԱՆ՝ ԼԻԲԱՆԱՆԸ ՀԵՌՈՒ ՊԱՀԵԼ ՇՐՋԱՆԱՅԻՆ ՓՈԹՈՐԻԿՆԵՐԷՆ

0
42

Հակառակ  շրջանային եւ  միջազգային բեմի վրայ արձանագրուող   աստիճանական  ձիւնհալին,   Լիբանանի  մէջ քաղաքական  բեւեռացումը  սկսած  է աւելի  բացորոշ դառնալ՝   Թեհրան- Ռիատ փոխյարաբերութիւններու  մշուշապատ  ճակատագիրին պատճառով:   Ճիշդ այս պատճառով,   հանրապետութեան նախագահ Միշէլ Սըլէյման պահանջեց Լիբանանը  հեռու պահել շրջանային հակամարտութիւններէն:

Նորանշանակ վարչապետ  Թամամ Սալամ լրագրողներուն եւ իր այցելուներուն յայտնեց, թէ կառավարութեան կազմութիւնը կը  դիմագրաւէ լուրջ  դժուարութիւններ եւ որեւէ նորութիւն մը  չունի  յայտնելիք այս ուղղութեամբ:  Սալամ   շեշտեց, թէ   մտադրութիւն չունի հրաժարելու, ոչ  ներկայիս,ոչ ալ՝ ապագային: Ան  նշեց, թէ  կը նախընտրէ  քուլիսներէ  հեռու շարունակել իր  շփումները, սխալ մեկնաբանութիւններու դուռ  չբանալու նպատակով:

Լիբանանի մօտ Միացեալ Նահանգներու դեսպան Տէյվիտ Հէյլ այցելութիւն մը տուաւ վարչապետարան  եւ  հանդիպում մը ունեցաւ  հրաժարեալ վարչապետ  Նեժիպ Միքաթիի հետ:  Հանդիպումը աւարելէ ետք, դեսպանը առանց որեւէ յայտարարութիւն կատարելու մեկնեցաւ  վարչապետարանէն: Միքաթի նաեւ  ընդունեց  Սահմանադրական Խորհուրդի  նախագահ դատաւոր Իսամ Սըլէյմանը:

 Հրաժարեալ  վարչապետ  Նեժիպ Միքաթի պատասխանեց իր հասցէին  Նեպիհ Պըրրիի  քննադատութեան, հարցնելով .«տրամաբանակա՞ն է  խորհրդարանի  նիստ պահանջեմ եւ  բացակայիմ…»: Միքաթի  նշեց,թէ անհրաժեշտ է  լրջութեամբ  եւ  պատասխանատուութեան  գիտակցութեամբ մօտենալ հարցերուն:

LEAVE A REPLY

Please enter your comment!
Please enter your name here