ԱՏՐՊԷՅՃԱՆ ՔԱՆ՞Ի ԶԻՆՈՒՈՐ ԿՈՐՍՆՑՈՒՑԱԾ Է ՂԱՐԱԲԱՂԻ ՊԱՏԵՐԱԶՄԻՆ

0
10

Ղարաբաղեան պատերազմէն 21 տարի ետք, Ատրպէյճան պաշտօնապէս չէ յստակացուցած պատերազմին ընթացքին զոհուած ատրպէյճանցիներուն թիւը:
«Ենի Մուսաւաթ» թերթը, սեփական հետազօտութիւն կատարելով՝ բացայայտած է, որ ատրպէյճանական բանակի հիմնական կորուստները եղած են Աղտամի շրջանին մէջ, ինչպէս նաեւ 1994-ի ձմրան եւ գարնան ամիսներուն Քարվաճառի շրջանին մէջ տեղի ունեցած մարտերուն ընթացքին: Այդ գործողութիւններուն ընթացքին գործուած սխալներուն պատճառով, հազարաւոր ատրպէյճանցի զինուորներ սպաննուած են:
Ըստ թերթին՝ Ատրպէյճան ղարաբաղեան պատերազմին ընթացքին աւելի քան 20 հազար զոհ տուած է, իսկ 50 հազար ուրիշներ վիրաւորուած են, մինչ 486 ուրիշներու ճակատագիրը անյայտ մնացած է: Ամէնէն լուրջ կորուստները եղած են Աղտամի շրջանին մէջ՝ շուրջ 7000:
«Սակայն, կորուստները չեն սահմանափակուիր միայն պատերազմական գործողութիւններու ժամանակաշրջանով: 1994-ին զինադադարի մասին համաձայնագիրի ստորագրումէն ետք, ատրպէյճանական բանակին մէջ հազարաւոր զինուորներ սպաննուած են: Մեր տեղեկութիւններով՝ 1995-էն մինչեւ հիմա, ատրպէյճանական բանակը 5 հազարէն աւելի զինուոր կորսնցուցած է», կը գրէ թերթը:
Նշենք, որ Ատրպէյճանի պաշտօնատարները ղարաբաղեան պատերազմին մէջ ատրպէյճանցիներու կորուստներուն մասին յաճախ տարբեր թիւեր կու տան՝ փորձելով կրճատել զոհերուն թիւը:
Այսպէս, եթէ Ատրպէյճանի նախկին նախագահ Հայտար Ալիեւ 1994-ի Յունիսին կը խօսէր 21 հազար զոհերու մասին, ներկայ նախագահ Իլհամ Ալիեւ, «Ճազիրա» պատկերասփիւռի կայանին հետ իր հարցազրոյցին ժամանակ (2011-ի Հոկտեմբերին) խօսած է 13-15 հազար զոհերու եւ անյայտ կորսուածներու մասին:
Յատկանշական է, որ 2007-ի Փետրուարին, ատրպէյճանական 9 հասարակական կազմակերպութիւններ եւ 3 փորձագէտներ հրապարակած են սեփական տուեալներ, ըստ որոնց՝ ղարաբաղեան պատերազմին 24 հազար ատրպէյճանցի զինուոր սպաննուած է, իսկ 4.5 հազարի ճակատագիրը անյայտ կը մնայ:

 

LEAVE A REPLY

Please enter your comment!
Please enter your name here