ԼԻԲԱՆԱՆԵԱՆ ԿԱՐՃ ԼՈՒՐԵՐ

0
61

–         Լիբանանի մօտ ՄԱԿ-ի ընդհանուր քարտուղարի ներկայացուցիչ Տերէք Փլամլի դիտել տուաւ, թէ Լիբանան անմիջական որոշումներու  կը կարօտի, որպէսզի  մարդասիրական  օժանդակութիւն հայթայթէ՝ Սուրիայէն ժամանող  գաղթականներուն:  Փլամլի մաղթեց, որ Լիբանանի օժանդակութեան համար, Քուէյթի մէջ  տեղի ունենալիք խորհրդաժողովը  արդիւնաւէտ  որոշումներ  որդեգրէ սուրիացի  գաղթականներուն մարդասիրական  օժանդակութիւն  առաքելու իմաստով: Միւս կողմէ,  Փլամլի ցաւ  յայտնեց, որ  աշխարհի  բոլոր պետութիւնները կը բոլորեն տնտեսական տագնապ եւ  ժամանակը աննպաստ է պահանջելու յաւելեալ օժանդակութիւն: 

–         Ընդհանուր դատախազութիւնը վաղը՝ Երկուշաբթի,  պիտի  քննարկէ Օժանդակութեան Գերագոյն Խորհուրդի թղթածրարը:  Խորհուրդի նախագահ  Իպրահիմ  Պաշիր կը մերժէ  իր հասցէին ուղղուած ամբաստանութիւնները, զանոնք նկատելով իր  դէմ  մղուած    քաղաքական արշաւ:  Նշենք, թէ կառավարութեան ընդհանուր քարտուղար  Սուհէյլ Պուժի՝  Պաշիրը կ’ամբաստանէ տասը միլիոն տոլար  իւրացնելու յանցանքով:

–         Լիբանանի մէջ  իսրայէլեան  գաղտնալսումներուն  ակնարկելով, խորհրդարանի նախագահ Նեպիհ Պըրրի  դիտել տուաւ, թէ  Լիբանանը ամբողջութեամբ  թափանցումի  ենթակայ է  Իսրայէլի  առջեւ: Պըրրի միաժամանակ  մերժեց ցպահանջ  խորհրդարանի նիստ հրաւիրելու  ոմանց  կոչերը, դիտել տալով, թէ  «Տիլիվըրի» չէ խորհրդարանը:

–         Մուսթաքպալ Հոսանքի պետ Ֆուատ  Սինիորա յայտարարեց, թէ Աշուրայի տօներէն ետք  հանդիպում մը պիտի ունենայ խորհրդարանի նախագահ Նեպիհ Պըրրիի  հետ:  Սինիորա   ընդգծեց, թէ անհրաժեշտ է  սահմանադրականօրէն նշեալ  ժամկէտին  իրագործել նախագահական ընտրութիւնները:  Սինիորա   մերժեց   կառավարութեան համար  9-9-6  տարազը:

–         Ներքին  ապահովութեան ուժերու տնօրէնի պաշտօնակատար գնդապետ  Իպրահիմ Պասպուս կասկած յայտնեց  Ալի Իյտը  ձերբակալելու կարելիութիւններուն:  Պասպուս  մաղթեց,որ  բանակը  շարունակէ  Թրիփոլիի ապահովական ծրագիրին գործադրութիւնը:

–         Արաբական Ժողովրդավարական Կուսակցութեան ընդհանուր քարտուղար  Ռաֆաաթ Իյտ կնքեց  մամլոյ ասուլիս մը եւ անդրադարձաւ Թրիփոլիի  մէջ  ահաբեկչութեան թիրախ  դարձած երկու  մզկիթներուն հետաքննութիւնները  պահելու ապահովական  ուժերու դերակատարութեան: Գալով հարցումի մը՝ արդեօ՞ք   իր հայրը պիտի ներկայանայ  Երեքշաբթի  օր նախատեսուած հարցաքննութեան,  Իյտ  բաւարարուեցաւ պատասխանելով, թէ  իրենք պիտի շարժին  օրէնքի համաձայն:

–         Այսօր ՝ Կիրակի,  տեղի պիտի ունենայ  Պէյրութի  մարաթոնը:  Այս պատճառով,  դէպի մայրաքաղաք  ուղղուող կարգ մը  ճանապարհներ պիտի  մնան  փակ:

–         Հրաժարեալ  վարչապետ Նեժիպ Միքաթի   ընդունեց լիբ-սուրիական Գերագոյն Խորհուրդի  նախագահ  Նասրի Խուրին եւ անոր հետ քննարկեց    շրջանային զարգացումները, ինչպէս  նաեւ  Սուրիոյ հակամարտութեան հետեւանքները Լիբանանի վրայ:  Աւելի ուշ, Միքաթի այցելեց Այն  էլ Թինէ եւ  հանդիպում մը  ունեցաւ խորհրդարանի նախագահ Նեպիհ Պըրրիի հետ:

 

LEAVE A REPLY

Please enter your comment!
Please enter your name here