ԻՐԱՆ ԵՒ ՎԵՑԵԱԿԸ ԿԱՌՈՒՑՈՂԱԿԱՆ ԲԱՆԱԿՑՈՒԹԻՒՆՆԵՐ ԿԸ ՎԱՐԵՆ

0
43

Իրանի միջուկային ծրագիրին  վերաբերեալ Իրանի եւ արեւմտեան պետութիւններու (Վեցեակ)  ներկայացուցիչներուն Ժընեւի մէջ  տեղի ունեցող  բանակցութիւնները  թեւակոխեցին երրորդ  օրը: Ընդհանուր  տպաւորութիւնը  այն է, որ  կողմերը  իսկապէս  տրամադիր  են հասնելու  համաձայնութեան:   Ճիշդ այս պատճառով Շաբաթ  օրուան բանակցութիւններուն միացան  Ռուսիոյ  արտաքին գործոց նախարար Սերկէյ Լաւրովը եւ Չինաստանի արտաքին գործոց նախարար  Ուան Ինը:  Այս միջոցին,  Միացեալ Նահանգներու նախագահ  Պարաք Օպամա մնայուն կապի մէջ  մնաց Իսրայէլի  վարչապետ Պենիամին Նեթանիահուի հետ, անոր փոխանցելով բանակցութեանց  մանրամասնութիւնները:

 Ֆրանսայի արտաքին գործոց նախարար Լորան Ֆապիւս  յայտնեց,թէ  Իրանի  հետ  համաձայնութիւն կնքելու պարագային, անհրաժեշտ է  հաշուի առնել միջինարեւելեան պետութիւններու  վերապահութիւնները:  Ֆապիւս խօսքը կ’ակնարկէր Իսրայէլի եւ Սէուտական Արաբիոյ կեցուածքներուն:

Եւրոպական Միութեան արտաքին  քաղաքականութեան գլխաւոր  պատուիրակ Քաթրին Աշթըն  յայտարարեց, թէ բանակցութիւնները  տեղի կ’ունենան կառուցողական  մթնոլորտի մէջ:

Նշենք, թէ  Աթոմական Ուժանիւթի Միջազգային Գործակալութեան գլխաւոր  տնօրէն  Եուքիա Ամանօ   Կիրակի, 10  Նոյեմբեր, պիտի ժամանէ Թեհրան եւ Իրանի մայրաքաղաքին մէջ հանդիպումներ պիտի ունենայ երկրին  ղեկավարութեան եւ  Իրանի միջուկային ծրագիրներու մասնագէտներուն հետ: Ամանօ՝   համագործակցութիւնը ամրապնդելու նպատակով հանդիպում մը պիտի ունենայ  նախագահ Հասան Ռոհանիի հետ:  Սկզբւոնքով, Ամանօ՝  համագործակցութեան  համաձայնագիր մը պիտի  ստորագրէ  Իրանի եւ Գործակալութեան միջեւ:

LEAVE A REPLY

Please enter your comment!
Please enter your name here