ՔԵՐՐԻ ՝ ՍՈՒՐԻՈՅ ՀԱԿԱՄԱՐՏՈՒԹԻՒՆԸ ԼՈՒԾԵԼՈՒ ՄԻԱԿ ՃԱՆԱՊԱՐՀԸ ԵՐԿԽՕՍՈՒԹԻՒՆՆ Է

0
28

Միացեալ Նահանգերու  պետական  քարտուղար   Ճոն Քերրի  նշեց, թէ  Սուրիոյ հակամարտութիւնը  լուծելու  միակ ճանապարհը երկխօսութիւնն է:  Ան խիստ կարեւոր  քայլ նկատեց Սուրիոյ  ընդդիմութեան կողմէ  « Ժընեւ -2» խորհրդաժողովին  մասնակցելու պատրաստակամութիւնը:  Քերրի,  որ  կարճ այցելութեամբ  մը   ժամանած էր Արաբական Միացեալ  Էմիրութիւններ , յայտարարեց, թէ   Ուաշինկթըն  չի մոռնար  Միջին Արեւելքի իր դաշնակիցները եւ յանձնառու կը մնայ անոնց  պաշտպանութեան:

Վերջին  օրերուն, Թուրքիոյ մէջ  հետզհետէ աւելի  բացայայտ կը դառնայ Սուրիոյ մէջ  կռուող Ալ Քայիտայի զինեալներուն զէնքով  օգնելու   թրքական կառավարութեան փորձերը: «Թարաֆ»  օրաթերթի լրագրող  Էմրէ   Ուսլուն կը գրէ, թէ  Սուրիա  ուղեւորուող  զինամթերքով   բեռնուած    մեքենաներու յայտնաբերման դէպքերը  արդէն սկսած են ազդել Թուրքիոյ վարկանիշին վրայ:

 Այլ գետնի վրայ, հալէպահայութիւնը  աշխարհի ամէնէն վտանգաւոր պատերազմներէն մէկուն ականատեսը կը դառնայ եւ ամիսներէ ի վեր կ’ապրին՝  պատերազմ, արիւն, վէրք, անօթութիւն, սով, ջուրի եւ ելեկտրականութեան տագնապ մահ եւ սուգ::

«Բերիոյ նիուզ» կը հաղորդէ, Հալէպի մէջ ջուրի երկարատեւ անջատումի պատճառով շաբաթ օր եւ երէկ ջրամատակարարում կատարուեցաւ հայաշատ շրջաններու մէջ՝ Վիլլաներ, Նոր Գիւղ, Աուժեթ Ժըպ եւ Սիւլէյմանիէի հայկական ակումբներէ, կեդրոններէ եւ եկեղեցիներէ:

Շրջաններու հազարաւոր բնակիչներ կարգ ու կանոնը առանց խախտելու ստացան իրենց տրամադրուած ջուրը: Անհրաժեշտ է նշել, որ ջրամատակարարումը տեղի ունեցաւ անվճար:

 «Բերիոյ նիուզ» Հալէպի մէջ առկայ ջուրի եւ ելեկտրականութեան լուրջ խնդիրին առնչութեամբ հաղորդեց, որ կառավարութիւնը կարելին կ՛ընէ կացութիւնը բնականոն վիճակին վերադարձնելու: Ջրամատակարարումը թէեւ ոչ ամբողջովին, սակայն աստիճանաբար կը վերականգնի, իսկ ելեկտրականութիւնը տակաւին կը մնայ խզուած:

Զինուորական գետնի վրայ   սուրիական բանակը  կարգ մը կարեւոր շրջաններ ազատագրեց   ծայրայեղականներու  իշխանութենէն:   Օտար  լրատուական աղբիւրներ կը հաղորդեն, թէ բանակը   ընդարձակ գործողութիւններ սկսծ է ձեռնարկել Դամասկոսի եւ Հալէպի մօտակայ  շրջաններուն մէջ:

LEAVE A REPLY

Please enter your comment!
Please enter your name here