ԱՄԱՆՕ ԱՐՀԵՍՏԱԳԻՏԱԿԱՆ ՀԱՄԱՁԱՅՆԱԳԻՐ ՄԸ ՍՏՈՐԱԳՐԵՑ ԹԵՀՐԱՆԻ ՀԵՏ

  Թեհրան այցելող Աթոմական Ուժանիւթի Միջազգային Գործակալութեան   ընդհանուր տնօրէն   Եուքիա Ամանօ   արհեստագիտական  համաձայնագիր մը ստորագրեց  Իրանի հետ: Ամանօ իր գոհունակութիւնը յայտնեց  Իրանի   ընթացքէն, աւելցնելով որ  Իրանի միջուկային  թղթածրարը կը  մօտենայ իր ուրախ աւարտին:

Միւս  կողմէ,Իրանի եւ  Վեցեակի միջեւ  բանակցութիւններու  յաջորդ  հանգրուանը  տեղի պիտի ունենայ  Չորեքշաբթի, 20  Նոյեմբերին,  Ժընեւի մէջ:  Սոյն  յայտարարութիւնը կատարեց  Եւրոպական Միութեան գլխաւոր  բանագնաց   Քաթրին Աշթըն.«  Իրանի արտաքին գործոց  նախարարը եւ  ես, 20  Նոյեմբերին պիտի  վերահանդիպինք այստեղ». լրագրողներուն  յայտնեց  Աշթըն: Եւրոպացի  դիւանագէտը նշեց, թէ  զգալի յառաջընթաց արձանագրուած է  բանակցութիւններու  ընթացքին, սակայն առկայ են որոշ  տարակարծութիւններ:

Իր  կարգին, Միացեալ Նահանգներու պետական քարտուղար   Ճոն Քերրի  հաւաստեց, թէ  բանակցութիւններուն մէջ արձանագրուած է  յառաջընթաց, իսկ  համաձայնութիւնը կրնայ կնքուիլ  քանի մը  շաբթուան ընթացքին.« Կրնամ առանց  չափազանցելու  ըսել, թէ   մենք ոչ միայն նուազեցուցած  ենք առկայ   տարաձայնութիւններու  քանակը, զանոնք    պարզաբանաց, այլեւ՝  զգալի   յառաջընթացի հասած ենք, այդ հարցերու  լուծման համար   մօտեցումները մշակելու ընթացքին».հաւաստեց Քերրի, աւելցնելով որ  բարի կամքի եւ  տքնաջան աշխատանքի  պայմաններու տակ.« Մեք կրնանք    յառաջիկայ  շաբթուան ընթացքին  լուծել մեր տարակարծութիւնները»: Ամերիկեան արտաքին  դիւանագիտութեան  ներկայացուցիչը ընդգծեց, թէ  երկար  ժամանակ  վատ  յարաբերութիւններ ունեցող  երկիրներու  պարագային, ժամանակ անհրաժեշտ է  վստահութեան հասնելու  համար:

Ֆրանսայի արտաքին գործոց  նախարար Լորան Ֆապիւս, որ   Շաբաթ օրուան   խորհրդաժողովին  ընթացքին անուղղակիօրէն  կը պաշտպանէր   Իսրայէլի եւ Սէուտական Արաբիոյ   վերապահութիւնները, յայտարարեց, թէ  այնքան ալ  հեռու  չէ   Իրանի հետ  համաձայնութեան մը կնքումը անոր միջուկային   թղթածրարին շուրջ: Իրանի միջուկային  ծրագիրներու պաշտօնակատար Ալի Աքպար Սալեհի  նշեց, թէ  Իրանի եւ Աթոմական Ուժանիւթի Միջազգային Գործակալութեան  միջեւ   համագործակցութեան  ճանապարհային   քարտէս մը պիտի դառնայ  իրողութիւն:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button