ԼԱՒԱՏԵՍՈՒԹԻՒՆ՝ ՆԱԽԱԳԱՀ ՍԸԼԷՅՄԱՆԻ ՌԻԱՏԷՆ ՎԵՐԱԴԱՐՁԻՆ ԼՈՅՍԻՆ ՏԱԿ

0
44

Հանրապետութեան նախագահ  Միշէլ Սըլէյման  եզրափակեց  Սէուտական Արաբիա կատարած այցելութիւնը եւ վերադարձաւ Լիբանան:  Նախագահ Սըլէյմանի հանդիպումները  ընդգրկեցին Ապտալլա Պըն Ապտէլ Ազիզ  վեհապետը,  սէուտցի այլ  պատասխանատուներ: Մարտ  14-ի ուժերուն կարծիքով   նախագահ Միշէլ Սըլէյմանի  Սէուտական Արաբիա  կատարած այցելութիւնը  պիտի նպաստէ  լուծելու բազմաթիւ  հարցեր:  Նշենք, թէ  նախագահ Սըլէյման  իր կեցութեան վայրին մէջ   ընդունեց նախկին վարչապետ Սաատ  Հարիրին եւ անոր հետ քնանրկեց  լիբանանեան բեմի վերջին զարգացումները:

Նորանշանակ  վարչապետ Թամամ Սալամ   դրական քայլ մը նկատեց  հանրապետութեան նախագահ Միշէլ Սըլէյմանին   Սէուտական Արաբիա  կատարած այցելութիւնը:  Սալամի կարծիքով,   նախագահը  դրական հաւաստիքներով  պիտի  վերադառնայ  Լիբանան: Սալամ   մերժեց  իրողական կառավարութիւն   կազմելու  տարբերակը, նախընտրելով  համախմբող կառավարութիւն  մը:  Սալամ   երէկ   իր  բնակարանին մէջ ընդունեց  Միջազգային Դրամատունը ներկայացնող  պատուիրակութիւն մը,  Լիբանանի մօտ  Միացեալ Նահանգներու  դեսպան Տէյվիտ  Հէյլը:

Նոր  կառավարութեան տարազին մասին խօսելով, խորհրդարանի նախագահ  Նեպիհ Պըրրի նշեց, թէ   9-9-6 տարազով կառավարութիւն մը, ոսկէ առիթ մը պիտի ըլլայ  Մարտ  14-ի ուժերուն համար: Հրաժարեալ վարչապետ Նեժիպ Միքաթի  նշեց, թէ  9-9-6 տարազով կառավարութին մը  ընդունելի իրեն համար: Միքաթի  միաժամանակ  զօրակցութիւն յայտնեց   հանրապետութեան նախագահին  պաշտօնավարութեան  ժամկէտը երկարաձգելու առաջարկին:  Միքաթի    շեշտեց, թէ Լիբանանի շահերը կը պահանջեն  ջերմ  յարաբերութիւններ պահպանել   Սէուտական Արաբիոյ հետ: 

Այլ  գետնի վրայ, վարչապետը  նամակ մը  յղեց  ընդհանուր դատախազութեան, պահանջելով   անձեռնմխելիութեան իրաւունքէն զրկել  Օժանդակութեան Գերագոյն Խորհուրդի  պետ Իպրահիմ  Պաշիրը:  Վերջինս կ’ամբաստանուի տաս միլիոն  տոլար  գումար մը   իւրացնելու յանցանքով:  Միքաթի ընդունեց  Լիբանանի  մօտ  Ռումանիոյ դեսպանը, Աքքարի շրջանը ներկայացնող պատուիրակութիւն մը՝ երեսփոխաններ  Հետի Հըպէյշի,  Խալէտ Զահրըմանի,  Խըտր   Հապիպի, Ռիատ Ռահալի եւ  նախկին երեսփոխան  Թալալ Մարաապիի    ընկերակցութեամբ:  Միքաթի նաեւ ընդունեց երեսփոխան  Պութրոս Հարպը,  Լիբանանի մօտ Միջազգային Ելեւմտական Հիմնարկի  նախագահ  Անալիզա  Ֆետիլինօն  եւ քննարկեց  Լիբանանին կատարելիք  օժանդակութիւններուն կարելիութիւնները:

LEAVE A REPLY

Please enter your comment!
Please enter your name here