ԱՏՐՊԷՅՃԱՆԻ ՀՈՂԱՅԻՆ ԱՄԲՈՂՋԱԿԱՆՈՒԹԻՒՆԸ ԱԶԳԱՅԻՆ ՀԱՐՑ Է ԹՈՒՐՔԻՈՅ ՀԱՄԱՐ

0
13

Ինչպէս ծանօթ է,  Ատրպէյճանի նախագահը իր  վերընտրութենէն   ետք,  արտասահմանեան առաջին այցելութիւնը կատարեց  Թուրքիա:  Անգարայի մէջ,  Ալիեւի հետ հանդիպումէն ետք, Թուրքիոյ նախագահ Ապտուլլա Կիւլ յայտարարեց, թէ  հանդիպման ընթացքին քննարկուած է Արցախի հակամարտութեան կարգաւորման հարցը:
Կիւլ աւելցուց, թէ բացի տարածաշրջանային հարցերէն, քննարկուած են նաեւ երկու երկիրներուն միջեւ երկկողմանի յարաբերութիւնները բարելաւելու կարելիութիւնները:
«Քննարկուեցաւ նաեւ Ատրպէյճանի տարածքային ամբողջականութեան, ինչպէս նաեւ բռնագրաւեալ ատրպէյճանական տարածքները ազատագրելու հարցը: Ասոնք Ատրպէյճանի եւ Թուրքիոյ համար ազգային հարցեր են», յայտարարեց Թուրքիոյ նախագահը:
Յայտնենք, թէ Կիւլ նաեւ Ալիեւը պարգեւատրեց  Թուրքիոյ բարձրագոյն՝  պետական շքանշանով:
Միւս կողմէ, Ատրպէյճանի արտաքին գործոց նախարարութեան բանբեր Էլման Ապտուլաեւ յայտնեց, թէ Հայաստանի խորհրդարանին կողմէ Լեռնային Ղարաբաղի անկախութեան ճանաչման մասին քննարկումը «բացասականօրէն պիտի ազդէ հակամարտութեան խաղաղ կարգաւորման գործընթացին վրայ եւ նպատակ ունի այդ գործընթացը խանգարել»:

 

LEAVE A REPLY

Please enter your comment!
Please enter your name here