ԼԻԲԱՆԱՆԵԱՆ ԿԱՐՃ ԼՈՒՐԵՐ

0
15

–         Քուէյթեան  «Ալ Ռայ»  օրաթերթին  տուած հարցազրոյցին  մէջ,Մուսթաքպալ  Հոսանքի պետ, նախկին  վարչապետ Ֆուատ  Սինիորա, առանց  մասնայատուկ   վերապահութիւն  արտայայտելու 9-9-6 տարազով նոր կառավարութեան մը կարելիութեան մասին, նախապայման կը դնէ Հըզպալլայի  զինեալներուն  հեռացումը  Սուրիայէն, այլապէս կը նախընտրէ՝ անկուսակցական  տարրերէ  բաղկացած  կառավարութիւն մը:

–          Երեսփոխան Սամիր Ճըսր  դատապարտեց  ոճիրներու մշակոյթը, ինչպէս նաեւ  շէյխ  Սաատէլտտին Ղայայի  սպանութիւնը: Ճըսր, դիտել տուաւ որ արտաքին  ձեռքեր  կեցած են  Թրիփոլիի ապահովական մագլցումներուն ետին:  Ան կառավարութենէն  պահանջեց անյապաղ  գործադրութեան դնել Թրիփոլիի համար  մշակած ապահովական  ծրագիրը:

–         Լիբանանի ելեկտրականութեան,  ինչպէս նաեւ«Թրայքոմ» ընկերութեան  պաշտօնեաները  «Քորնիշ Նահր» շրջանի ելեկտրականութեան ընկերութեան շէնքին առջեւ, անիւներ  վարելով   բողոքի հաւաք մը կազմակերպեցին: Անոնք   բողոքեցին իրենց հանդէպ ցուցաբերուած անտարբերութեան, նշելով թէ  անցնող երեք ամիսներուն չեն ստացած աշխատավարձ:

–         Լիբանան  Ուժեր Կուսակցութեան գործադիր խորհուրդի  պետ Սամիր Ժաաժա յայտնեց, թէ Մարտ 14-ի ուժերը պիտի  չարտօնեն, որ անտեսումի ենթարկուի  նախագահական  ընտրութիւններու գործընթացը:  Ժաաժա  նշեց, թէ  սահմանադրութիւնը յստակօրէն կը նշէ, թէ գործող  նախագահին  ժամկէտը աւարտելէ տաս օրեր առաջ,  նորին  ընտրութիւնը  չկայանալու  պարագային, խորհրդարանը պարտադիր  նիստով մը  կրնայ  ընտրել  երկրի նոր նախագահ:

–         Ներքին գործոց նախարարի  պաշտօնակատար  Մարուան Շարպէլ  յայտարարեց, թէ   ամբողջացուցած  է Թրիփոլիի համար  մշակուած ապահովական ծրագիրը, սակայն  կը  սպասէ կարգ մը  իրաւական կէտերու  գործադրութեան: Նախարարը  դատապարտեց շէյխ Սաատէլտտին Ղայայի սպանութիւնը,  քննադատելով  քաղաքական տարակարծութիւնները  ոճիրներու եղանակով լուծելու ընտրանքը:   

–         Կաթողիկէ վարժարաններու ընդհանուր քարտուղար, հայր Պութրոս Ազար յայտարարեց, թէ   կաթողիկէ վարժարանները պիտի չմասնակցին յայտարարուած   դասադուլին:  Ազար նշեց, թէ    վարժարաններուն դուռերը սովորական  օրերու  նման, պիտի  մնան բաց:

–         Աշուրայի առիթով,  Հըզպալլայի  ընդհանուր քարտուղար   սէյիտ Հասան Նասրալլա այսօր առաւօտեան պիտի արտասանէ խօսք մը:

–          Խորհրդարանի նախագահ Նեպիհ Պըրրի  խորհրդարանական բոլոր յանձնաժողովները  ընդհանուր  նիստի մը  հրաւիրեց  յառաջիկայ  Երեքշաբթի  առաւօտեան, սերտելու  կարգ մը  օրինագիծեր:

–          Տեղեկատուութեան նախարարի պաշտօնակատար Ուալիտ Տաուաք իր  գրասենեակին մէջ  ընդունեց  երեսփոխան Ժան Օղասապեանը եւ անոր հետ քննարկեց  լիբանանեան բեմի վերջին զարգացումները:

–         Գրող՝ Ամին Մաալուֆ  Ֆրանսական Ակադեմիայի անդամ դառնալու առիթով, հաղորդակցութեան նախարարութիւնը շրջանառութեան մէջ դրաւ  հարիւր  լիբանանեան  ոսկի արժողութեամբ  յիշատակի  դրոշմաթուղթեր:

LEAVE A REPLY

Please enter your comment!
Please enter your name here