Մոսկուա Կը Դատապարտէ Դամասկոսի Բնակելի Վայրերու Ռմբակոծումը

0
32

Ռուսիա, ակնարկելով Դամասկոսի Պապ Շարքի կամարին մօտ գտնուող Ս. Սարգիս եկեղեցւոյ կից Ազգային Սրբոց Թարգմանչաց ճեմարանի դրան առջեւ երկու հրասանդի հրթիռներ արձակելու դէպքին՝ յայտարարեց, որ բուռն կերպով կը դատապարտէ Սուրիոյ մէջ քաղաքայիններու դէմ «ահաբեկչական գործողութիւններ»ն ու Դամասկոսի մէջ բնակելի վայրերու ռմբակոծումը:
Յիշեցնենք, որ այդ դէպքին ընթացքին արձանագրուած էին 5 զոհեր, որոնց շարքին էին երկու հայ աշակերտներ՝ Յովհաննէս Աթոքանեան եւ Վանեսա Միխօ Պետրոս, իսկ վիրաւորներուն մէջ նոյնպէս կային քանի մը հայ աշակերտներ:
Ռուսիոյ արտաքին գործոց նախարարութիւնը յայտնեց. «Այս վճռական պահուն ծայրայեղականներու շարժումներուն աշխուժացման նպատակը «Ժընեւ-2» խորհրդաժողովի պատրաստութեանց արգելակումն է»:
Նախարարութիւնը ընդդիմադիր զինեալներուն վրայ ազդեցութիւն ունեցող բոլոր կողմերուն կոչ ուղղեց՝ Սուրիոյ մէջ ամէն տեսակի բռնարարքի վերջ տալու ջանքերուն մէջ իրենց դերը կատարելու:
Միւս կողմէ, Թուրքիոյ արտաքին գործոց նախարար Ահմետ Տաւութօղլու, անդրադառնալով Սուրիոյ հիւսիսարեւելեան շրջանները բնակող քիւրտերուն կողմէ ժամանակաւոր կառավարութիւն ստեղծելու ծրագիրին՝ պնդեց, թէ «այդպիսի ինքնավարութիւն մը կարելի չէ միակողմանիօրէն յայտարարել»:
Քրտական Ժողովրդավարական Միութիւն կուսակցութիւնը այդ յայտարարութիւնը կատարած էր Գամըշլիի մէջ տեղի ունեցած բանակցութիւններէն ետք:

LEAVE A REPLY

Please enter your comment!
Please enter your name here