ԱՐԵՒՄՈՒՏՔԸ ԿԸ ՓՈՐՁԷ ՄԵՂՄԱՑՆԵԼ ՈՒՔՐԱՆԻՈՅ ՄԷՋ ՌՈՒՍԻՈՅ ՀԱԿԱԴԱՐՁՈՒԹԵԱՆ ՔԱՅԼԵՐԸ

0
70

Ուաշինկթըն    լուրջ անհանգստացած է  Ուքրանիոյ տարածքին  մէջ ռուսական  զօրքեր  օգտագործելու    Ռուսիոյ  Դաշնութեան  Խորհուրդի  1  Մարտի    որոշումէն: Ռուսիոյ նախագահ  Վլատիմիր Փութին  հեռախօսազրոյցներ ունեցաւ ՄԱԿ-ի ընդհանուր քարտուղար  Պան Քի Մունին, Ֆրանսայի նախագահ  Ֆրանսուա Հոլանտին:  Փութին   յստակօրէն      ընդգծեց, թէ  Ռուսիա   ձեռնածալ պիտի  չմնայ,  Խրիմի եւ Արեւելեան Ուքրանիոյ  ռուսախօս բնակիչներուն   հանդէպ  կիրառուող  բռնութիւններուն առջեւ:

Միացեալ Նահանգներու  նախագահ  Պարաք Օպամա  շուրջ  մէկուկէս ժամ  երկարող    հեռախօսազրոյց մը ունեցաւ  նախագահ  Վլատիմիր  Փութինի հետ:  Իր կարգին, պետական  քարտուղար Ճոն Քերրի դիտել տուաւ, թէ  Ուքրանիոյ տարածութեան մէջ   Ռուսիոյ ռազմական  գործողութիւնները աւելի  պիտի սրեն տարածաշրջանի  լարուածութիւնը եւ  պիտի  յանգեցնեն ռուս-ամերիկեան յարաբերութիւններու վատթարացման:  Քերրի նշեց, թէ   հեռախօսազրոյց  մը ունեցած  է  Ռուսիոյ  արտաքին գործոց  նախարար Սերկէյ  Լաւրովի հետ որպէսզի «Համակարգեն   առնուելիք  քայլերը»:

Պաշտպանութեան նախարար   Չաք Հէյկէլ յայտնեց, թէ հեռախօսազրոյց  մը ունեցած է  Ռուսիոյ  իր գործընկերոջ Սերկէյ   Շոյքուի հետ: Ըստ Հէյկըլի՝   վերջինս  զգուշացուցած է  Շոյքուն, յայտնելով  թէ   Ուքրանիոյ մէջ ռուսական  միջամտութիւնը լուրջ սպառնալիք   մը պիտի  դառնայ  համայն աշխարհի  համար:

Ուքրանիոյ մէջ  յայտարարուեցաւ   ընդհանուր զօրահաւաք:  Զինուած ուժերը կը  գտնուին   մարտական ամբողջական  պատրաստուածութեան վրայ:

Առ  ի բողոք Ռուսիոյ  քայլերուն, Գանատա  ետ կանչեց  Մոսկուայի մօտ իր դեսպանը եւ  դադրեցուց  Ռուսիոյ նախագահութեամբ  G-8ի նիստերուն իր մասնակցութիւնը:   Ֆրանսա պահանջեց  ընդհանրապէս   դադրեցնել Սոչիի մէջ նախատեսուած  նիստերը: Բրիտանիա նոյնպէս  յայտարարեց, թէ  պիտի   չմասնակցի  Ռուսիոյ նախագահութեամբ  G-8ի նիստերուն:

Ուքրանիոյ վարչապետ Արսէնի  Եացենիուք   յայտարարեց, թէ  վարչապետ Տիմիթրի  Մետեւետեւ իրեն  հաւաստիացուցած է, թէ Մոսկուա տակաւին  չէ   ընդունած  Ուքրանիա  զօրք  մտցնելու  որոշում:  Ընդդիմութեան  ղեկավարներէն  Եուլիա Թիմոշենքօ  յայտարարեց, թէ  Ռուսիա ՝ Աբխազիոյ եւ  Օսեթիոյ  օրինակով պատերազմ կը   փորձէ  հրահրել Ուքրանիոյ մէջ:  Թիմոշենքօ նաեւ յայտնեց, թէ   սկզբունքով  այցելութիւն մը պիտի  տայ  Մոսկուա: Միւս կողմէ,  նախագահի պաշտօնակատար Ալեքսանտր Թուրչինով յայտարարեց, թէ     իշխանութիւնները մասնակիօրէն  փակ պիտի  պահեն երկրին  օդային տարածքը:

Եւրոպական Միութեան արտաքին   քաղաքականութեան գլխաւոր  բանագնաց  Քաթրին Աշթըն Մոսկուան զգուշացուց Ուքրանիա  զօրք  մտցնելու հետեւաքներէն:  Աշթըն, Չորեքշաբթի պիտի այցելէ  Քիեւ:

Լրատուական  կարգ մը աղբիւրներ  հաղորդեցին, թէ  ռուսական   նաւատորմը   պաշարած է   Սեւ Ծովու  մէջ ուքրանական  ռազմանաւերը:

LEAVE A REPLY

Please enter your comment!
Please enter your name here