ՆՇՄԱՐ ԵՐԿՐԻՆ ԱՆՎՏԱՆԳՈՒԹԻՒՆԸ ԵՒ ԵՐԿԽՕՍՈՒԹԵԱՆ ՆԻՍՏԸ

Այսօրուան ազգային երկխօսութեան նիստը տեղի ունենայ կամ` ոչ, լիբանանցիները հակադիր բեւեռներու վրայ յարած կը դիտեն զիրար: Որքան ալ կարեւոր թուին ապօրէն զէնքը, պաշտպանութեան ռազմավարութիւնը, հաղորդակցութեան տեղեկութիւնները փոխանցելու նախապայմանները, նոյնքան եւ կենսական է հայրենիքի հանդէպ հաւատարմութեան հրամայականը: Տխուր իրողութիւն մը, որ նախանձախնդիր ոեւէ լիբանանցիի համար անպայմանօրէն պիտի ըլլար երկխօսութեան նիստերուն ամենահրատապ օրակարգը:
Լիբանանի քաղաքական բեմին վրայ գործող հոսանքները հաւատարի՞մ են արդեօք Միջերկրականի արեւելքին վրայ ծնունդ առած 10452 քառակուսի քիլոմեթր տարածութիւն հաշուող բազմաչարչար այս պետականութեան սահմանադրութեան, Թայէֆի համաձայնագիրին: Հայրենիքի հանդէպ հաւատարմութեան խորհուրդը խախտած է լիբանանցիներուն մօտ: Իւրաքանչիւրը իւրովի պատկեր մը կազմած է ազգային ուխտին վերաբերեալ:
Քաղաքական հոսանքները երկիրը դանդաղօրէն կը մխրճեն մեծ պետութիւններու « պզտիկե խաղերուն մէջ: Ո՞վ պիտի վճարէ անոնց կամշոտ եւ կամապաշտ գայթակղութիւններուն գինը, եթէ ոչ` երկիրը եւ անոր վրայ ապրող ժողովուրդը: Ո՞վ պիտի կրէ արտագաղթող ուղեղներու, պետական մսխումներուն եւ յարաճող պարտքին, տնտեսական եւ ընկերային ընկրկումներուն պատասխանատուութիւնը, եթէ ոչ` ժողովուրդը: Ո՞վ պիտի կրէ Միջին Աւեւելքի մէջ համակեցութեան, հանդուրժողութեան եւ կրօնական չափաւորականութեան նախատիպ Լիբանանը արմատական հոսանքներու ոստայնի մը վերածելու հետեւանքները, եթէ ոչ` ժողովուրդը: Ու՞ր հասած է խորհրդարանական համակարգով արաբական աշխարհին ժողովրդավարութեան խորհրդանիշ Լիբանանը…:
Առանց հայրենիքի հանդէպ հաւատարմութեան անիմաստ է խօսիլ ազգային երկխօսութեան արդիւնաւէտ նիստերու մասին: Ուխտի վերանորոգութեան անհրաժեշտութիւն ունին լիբանանցիները:
Ոչ ոք կը մերժէ երկխօսութիւնը, պայմանաւ, որ մասնակըցները ցուցաբերեն մտահոգութիւնները հաւաքաբար լուծելու վճռակամութիւն: Մեր համեստ կարծիքով, երկխօսութեան նիստերու սեղանին վրայ նոյնքան կարեւոր օրակարգ դարձած է հիւսիսային Լիբանանի ապահովական իրավիճակը: Մտահոգիչ այս կացութեան առջեւ լռութիւն կը ցուցաբերէ կառավարութիւնը: Նախարարաց խորհուրդէն կը պահանջուի կտրականապէս արգիլել հիւսիսային Լիբանանի սահմանամերձ շրջանները Սուրիոյ ընդդիմութեան եւ սուրիական բանակին միջեւ կռուախնձորի վերածելու փորձերը: Քաղաքական թիկունք հայթայթել բանակին` լիարժէք պատասխան տալու խախտումներուն եւ պաշտպանելու երկրին գերիշխանութիւնը: Լիբանան չի կրնար պատսպարան ծառայել Սուրիոյ ընդդիմութեան, ոչ ալ հանդուրժել սուրիական բանակի մուտքը իր հողերէն ներս: Ին՞չ դիրք պիտի բռնէ լիբանանեան կառավարութիւնը շիկացած այս շագանակին առջեւ…:
www.araraddailynews.com

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button

 

STAINLESS STEEL