ԵՐԵՒԱՆ, «Արմէնփրէս».- Պաշտօնական այցելութեամբ Ռուսիա գտնուող Հայաստանի Ազգային ժողովի նախագահ Ալէն Սիմոնեանի գլխաւորած պատուիրակութիւնը 4 Հոկտեմբերին հանդիպում ունեցաւ Ռուսիոյ արտաքին գործոց նախարար Սերգէյ Լաւրովի հետ։
Լաւրով բարձր գնահատեց հայ-ռուսական ռազմավարական եւ գործընկերային յարաբերութիւնները`անոնց վկայութիւնը նկատելով այն, որ Հայաստանի Ազգային ժողովի նախագահը իր առաջին պաշտօնական այցելութիւնը կատարեց Ռուսիա։
Կողմերը հանգամանօրէն քննարկեցին տարածաշրջանին մէջ ստեղծուած իրավիճակը` անդրադառնալով մնայուն խաղաղութեան հաստատման եւ անոր իրականացումը խոչընդոտող հարցերու վերացման։ Այդ պարունակին մէջ, յատկապէս կարեւոր նկատուեցաւ հայ ռազմագերիներու եւ քաղաքացիներու վերադարձի հարցը:
Անդրադարձ կատարուեցաւ նաեւ հայ-ռուսական համագործակցութեան՝ քաղաքական, տնտեսական, մշակութային, մարդասիրական եւ այլ ոլորտներու մէջ: Զրոյցին ընթացքին առանձնապէս շեշտուեցաւ խորհրդարաններուն դերակատարութիւնը՝ երկկողմ փոխգործակցութեան զարգացման եւ ամրապնդման մէջ:
Երկուստեք կարեւոր նկատեցին նաեւ արդիւնաւէտ համագործակցութիւնը ԱՊՀի միջխորհրդարանական վեհաժողովի եւ ՀԱՊԿի խորհրդարանական վեհաժողովի ծիրին մէջ` նկատի ունենալով Հայաստանի նախագահութեան առաջնահերթութիւնները: