Ազրպէյճան պատրաստ է բանակցութիւններու սկսելու Հայաստանի հետ յարաբերութիւններու կարգաւորման համար, հաւանական կը նկատէ Եւրոպական Միութեան` այս հոլովոյթին գործօն մասնակցութիւնը: «Երկիր» կը հաղորդէ, որ այս մասին Եւրոպական Միութեան նոր դեսպան Փիոթր Միխալքոյի հաւատարմագիրները ընդունած ատեն ըսած է Ազրպէյճանի նախագահ Իլհամ Ալիեւ:
«Այժմ գլխաւոր հարցը յետպատերազմեան շրջանն է, շրջանին մէջ անվտանգութիւնն ու խաղաղութիւնը: Մենք կ՛ուզենք շրջել այս էջը, ասիկա մեր քաղաքականութիւնն է: Մենք կ՛ուզենք բարելաւել յարաբերութիւնները Հայաստանի` մեր դրացիին հետ: Մենք պատրաստ ենք Հայաստանի հետ բանակցութիւններու սկսելու խաղաղութեան համաձայնագիրի ստորագրութեան, սահմաններու սահմանազատման, հաղորդակցութեան բացման շուրջ: Այս հոլովոյթը մասամբ սկսած է», ըսած է Իլհամ Ալիեւ:
Ազրպէյճանի նախագահը նշած է, որ Եւրոպական Միութիւնը նոյնպէս կրնայ գործօն մասնակցութիւն ունենալ այս հոլովոյթին, մանաւանդ որ «նման ցանկութիւն աւելի շատ կը տեսնեմ, ասիկա կրնայ բազմաթիւ ոլորտներու մէջ մեզի օգնել: Ընդհանուր առմամբ, Հարաւային Կովկասի մէջ կացութիւնը կրնայ բոլորովին նոր ծաւալներ ունենալ, որոնք չեն եղած երեսուն տարիէ ի վեր: Ատիկա կրնայ նաեւ կայունութեան, կանխատեսելիութեան եւ խաղաղութեան շատ կարեւոր գործօն ըլլալ»:
Ան նաեւ յայտարարած է, որ Ազրպէյճան Եւրոպա կազ մատակարարելու աշխարհագրութիւնը ընդլայնելու ծրագիրներ ունի եւ պատրաստ է այդ ուղղութեամբ Պրիւքսելի հետ աշխատելու: