Ատրպէյճանի նախագահ Իլհամ Ալիեւ յայտարարած է Ատրպէյճան-Ռուսիա-Թուրքիա համագործակցութեան եռակողմանի ձեւաչափ ստեղծելու կարելիութեան մասին:
Ատրպէյճանի նախագահին համաձայն, ռուս-ատրպէյճանական դաշնակցային համագործակցութեան մասին հռչակագիրը պատմական փաստաթուղթ է եւ այժմ Պաքուն հետաքրքրուած է ՆԱԹՕի անդամ Թուրքիոյ եւ ՀԱՊԿի անդամ Ռուսիոյ հետ եռակողմանի ձեւաչափով համագործակցութեամբ:
Ալիեւ նշած է, որ Ատրպէյճան-Ռուսիա-Թուրքիա համագործակցութեան եռակողմանի ձեւաչափը տակաւին ձեւակերպուած չէ եւ արտաքին գործոց նախարարներու կամ նախագահներու մակարդակով հանդիպումներ տակաւին չեն կայացած, սակայն այդ ուղղութեամբ աշխատանքներ կ՛ընթանան:
«Մեզի համար շատ հաճելի է, որ նախագահներ Էրտողանի եւ Փութինի միջեւ կան շատ վստահելի յարաբերութիւններ, անոնք երկուքն ալ այդ մասին հրապարակաւ կը խօսին: Այնպէս որ, կը կարծեմ, հեռու չէ այն օրը, երբ պիտի ձեւակերպենք այդ յարաբերութիւնները: Որովհետեւ Ատրպէյճան կը հանդիսանայ Ռուսիոյ եւ Թուրքիոյ դաշնակիցը, այստեղ հարց կը ծագի յաջորդ քայլին մասին: Սակայն ատիկա արդէն մեր ընելիքը չէ, մենք մեր կողմէն միշտ աշխատած ենք երկու երկիրներու շահերուն մերձեցման ուղղութեամբ», Մոսկուայի մէջ ռուսական գլխաւոր լրատուամիջոցներու ներկայացուցիչներուն հետ հանդիպումին ընթացքին յայտարարած է Ատրպէյճանի նախագահը:
Նշենք, որ Ատրպէյճան Յունիս 2021ին Թուրքիոյ հետ դաշնակցային յարաբերութիւններու մասին հռչակագիր ստորագրած էր, իսկ այս տարուան Փետրուար 22ին՝ Ռուսիոյ հետ: