ԼԻԼԻԹ ՄՈՒՐԱԴԵԱՆ
Հայաստանի Հանրապետական կուսակցութեան պատգամաւոր Յակոբ Յակոբեանի՝ աղքատութեան մասին յայտարարութիւնները յարուցել են վրդովմունք ու բուռն քննարկումներ սոցիալական ցանցերում ու հանրութեան շրջանում:
Օրերս ՀՀԿ խմբակցութեան անդամ Յակոբ Յակոբեանը, պատասխանելով հարցին, թէ աղքատները ինչպէ՞ս պէտք է դիմակայեն թանկացումներին, արձագանգել էր. «Աղքատը քիչ է ծախսում, ու նրա մօտ սովորութիւն կայ ինքնաբուխ խուսափել թանկացած ապրանքներից: Պետական քաղաքականութիւնն էլ նրա համար է, որ աղքատ շերտին պաշտպանի թանկացումների հարուածից: Հիմա կարիք չկայ, որ պետութիւնն անդրադառնայ դրան», ասել էր ՀՀ ԱԺ առողջապահութեան եւ սոցիալական հարցերի մշտական յանձնաժողովը ղեկավարող պատգամաւորը:
Մէջբերենք «Ժողովուրդ» օրաթերթին նրա հարցազրոյցից մի հատուած. «Ծայրայեղ աղքատների սովորոյթի մէջ կայ՝ նրանք խուսափում են թանկացող կամ թանկ ապրանքներ գնելուց: Դա ինքնապաշտպանութեան ինստինկտ (բնազդ-Խմբ.) է: Պէտք է հաշուի առնել՝ աղքատը քիչ է ծախսում, թանկացումը բերում է նրան, որ աղքատը ինքնակամ, ինքնաբուխ խուսափելու է թանկացած ապրանքներից»:
Մամուլում ու սոցցանցերում այս արտայայտութիւնը տարբեր մեկնաբանութիւններ ստացաւ, ձեւափոխուեց մտքի, թէ «աղքատներին թանկացումը չի վնասում, նրանք գումար չունեն եւ առեւտուր չեն անում, ի՞նչ կապ ունի՝ կարագն ու միսը թանկ են, թէ էժան»: Սա բուռն քննարկումների թեմա դարձաւ՝ հասնելով մանդատը վայր դնելու պահանջի:
Պատգամաւոր Յակոբ Յակոբեանի ու ՀՀԿ խմբակցութեան ղեկավար Վահրամ Բաղդասարեանի հետ կապ հաստատել ու մեկնաբանութիւն ստանալ այդպէս էլ օրուայ ընթացքում չյաջողուեց. զանգերն անպատասխան մնացին:
«ԱՐՄՌԱԴԻՕ»