ՈՒԱՇԻՆԿԹԸՆ․- Միացեալ Նահանգներու արտաքին գործոց նախարարութեան բանբեր Նետ Փրայս յայտարարեց, թէ Ուաշինկթըն կը շնորհաւորէ Հայաստանի ժողովրդը՝ 20 Յունիսի խորհրդարանական ընտրութիւններուն համար: «Կ՛ողջունենք ընտրութիւններուն հետեւած ԵԱՀԿ-ԺՀՄԻԳի դիտորդական առաքելութեան ընդհանուր առմամբ դրական գնահատականը», ըսաւ ան, նոյն ժամանակ մտահոգութիւն յայտնելով այն իրողութեան համար, որ ընտրութեան մասնակցողներուն մօտ ակնյայտ էր խիստ բեւեռացումը եւ բորբոքիչ հռետորաբանութիւնը։ «Կոչ կ՛ընենք բոլոր քաղաքական կողմերուն, որ յարգեն այս ընտրութիւններու արդիւնքները, երբ անոնք վաւերացուին, իսկ մտահոգիչ հարցերու վերաբերեալ կիրառեն ընտրութիւնները բողոքարկելու իրաւական գործընթացը եւ խուսափին քաղաքական հակադարձութիւններէ, մինչ Հայաստան կը շարունակէ իր ճամբան դէպի ինքնիշխան, ժողովրդավարական, խաղաղ եւ բարգաւաճ ապագայ», աւելցուց Նետ Փրայս:
