Յորդանան երէկ իր մայրաքաղաքին` Ամմանի մէջ հիւրընկալեց Լիբանանին ելեկտրականութիւն եւ կազ տրամադրելու կարելիութիւնները սերտելու քառակողմ հանդիպում մը, որուն մասնակցեցան Յորդանանի, Եգիպտոսի, Սուրիոյ եւ Լիբանանի ուժանիւթի նախարարները:
Նշենք, որ Միացեալ Նահանգներ Եգիպտոսի եւ Յորդանանի հետ պայմանաւորուածութիւն ձեռք ձգած էին` Լիբանանին ուժանիւթ տրամադրելու իմաստով, եւ այդ ուժանիւթին մաս կը կազմէին յորդանանեան ելեկտրական հոսանքն ու եգիպտական կազը` Սուրիոյ վրայով:
Հանդիպումէն ետք մամլոյ միացեալ ասուլիսի մը ընթացքին Յորդանանի ուժանիւթի նախարար Հալա Զաուաթի յայտնեց, որ քննարկած են եգիպտական կազը Յորդանանի եւ ապա Սուրիոյ ընդմէջէն Լիբանանին փոխանցելու կարելիութիւնը` աւելցնելով, որ յառաջիկայ շաբթուան ընթացքին պիտի գումարուի նաեւ այլ նիստ մը, որուն ընթացքին պիտի քննարկուի յորդանանեան ելեկտրական հոսանքը Լիբանանին փոխանցելու կարելիութիւնները, որպէսզի պատրաստուին համաձայնագիրները:
Զաուաթի նշեց, որ ասիկա կատարելու համար պէտք է ստուգել Սուրիոյ ենթակառոյցները, որովհետեւ անոնք պատրաստ պէտք է ըլլան ելեկտրականութիւնը Լիբանան փոխանցելու աշխատանքին:
Ան ըսաւ, որ եգիպտական կազն ու յորդանանեան ելեկտրականութիւնը Լիբանանին տրամադրելը բոլոր երկիրներուն համար կարեւոր է` աւելցնելով, որ Յորդանանի Ապտալլա Բ. թագաւորը ամէն ջանք ի գործ կը դնէ Լիբանանի օժանդակութեան համար:
Զաուաթի նկատել տուաւ, որ առաւելագոյնը երեք շաբթուան ընթացքին երկու համաձայնագիրներուն պատկերացումները պատրաստուած կ՛ըլլան:
Եգիպտոսի ուժանիւթի նախարար Թարեք Մուլլա յայտնեց, որ արաբական կազատարին աշխատանքները տասը տարի կասեցնելէ ետք, այդ կազատարը դարձեալ պիտի բանի` աւելցնելով, որ պէտք է ստուգել կազատարը իր բոլոր ցանցերով:
Մուլլա հաստատեց, որ հանդիպումին ընթացքին ճշդուած է ուղեգիծ մը, որպէսզի արաբական կազատարը կարելի եղածին չափ շուտ կարելի ըլլայ բանեցնել եւ Լիբանանին կազ հասցնել:
Ուժանիւթի եւ ջուրի հարցերու նախարարի պաշտօնակատար Ռեմոն Ղաժար յայտնեց, որ Յորդանանի, Եգիպտոսի եւ Սուրիոյ հետ գործակցութիւնը բնական ընթացք է` աւելցնելով, որ Լիբանան Միջազգային դրամատան հետ կը գործակցի եգիպտական կազին սակը վճարելու համար:
Ան նշեց, որ աւելի ուշ կարելիութիւն պիտի ըլլայ նաեւ Յորդանանի արտադրած ելեկտրական հոսանքը ստանալու` Սուրիոյ մէջ ելեկտրականութեան փոխանցման ցանցին վրայ կատարուելիք նորոգութիւններէն ետք: Ղաժար հաստատեց նաեւ, որ յանձնախումբերը կը շարունակեն Իսրայէլի հետ հանդիպիլ` ծովային սահմանագծում կատարելու նպատակով: Ան աւելցուց, որ իրենց նախատեսութեամբ մինչեւ 2022-ի աւարտ հոր մը եւս պիտի փորուի: