ԵՐԵՒԱՆ, «Ազատութիւն».- Հայաստանի հետ յարաբերութիւններու լուծման համար յատուկ ներկայացուցիչ նշանակեց Ուաշինկթընի մօտ Թուրքիոյ նախկին դեսպան Սերտար Քըլըչը: Այս մասին յայտարարեց Թուրքիոյ արտաքին գործոց նախարար Չաւուշօղլու, որ 2008-2010 թուականներուն Պէյրութի մօտ Թուրքիոյ դեսպան էր, 2010-2012ին՝ Ազգային ապահովութեան խորհուրդի ընդհանուր քարտուղար, 2012-2014` Թոքիոյի, 2014-2021ին Ուաշինկթընի մօտ Անգարայի դեսպանը:
Պաշտօնական Երեւան տակաւին չյայտարարեց, որ ով պիտի ըլլայ Հայաստանի բանագնացը Անգարայի մօտ:
Միացեալ Նահանգները ողջունեց Հայաստանի եւ Թուրքիոյ կողմէ յարաբերութիւններու լուծման գծով ձեռնարկուող քայլերը:
«Մենք կ՛ողջունենք եւ վճռականօրէն կ՛աջակցինք Թուրքիոյ արտաքին գործոց նախարար Մեւլութ Չաւուշօղլուի եւ Հայաստանի արտաքին գործոծ նախարարութեան յայտարարութիւններուն՝ կարգաւորման գործընթացին համար յատուկ ներկայացուցիչներ նշանակելու վերաբերեալ», «Թուիթըր»ի իր էջին վրայ գրած է Միացեալ Նահանգներու արտաքին գործոց նախարար Էնթընի Պլինքըն:
Ռուսիոյ արտաքին գործոց նախարարութեան բանբեր Մարիա Զախարովա յայտարարեց, որ Ռուսիա կ՛ողջունէ հայ-թրքական յարաբերութիւններու կարգաւորման ուղղուած գործընթացները:
«Մենք կը մեկնինք այն երեւոյթէն, որ հայ-թրքական յարաբերութիւններու լուծումը պիտի նպաստէ տարածաշրջանին մէջ ընդհանուր իրավիճակի բարելաւման, բարեդրացիութեան եւ վստահութեան մթնոլորտի ձեւաւորման թէ՛ տարածաշրջանին մէջ եւ թէ ժողովուրդներուն միջեւ: Այս առումով կ՛ողջունենք Անգարայի եւ Երեւանի կողմէ վերջին շրջանին ցուցաբերուող՝ երկկողմ երկխօսութեան սկսելու տրամադրուածութիւնը` յարաբերութիւններու կարգաւորման հարցները քննարկելու համար», նշեց Զախարովա:
Անդրադառնալով երկու երկիրներուն կողմէ ներկայացուցիչներու նշանակման՝ Զախարովա ըսաւ, որ այդ մէկը տրամաբանական եւ ողջամիտ քայլ է: «Մենք մեր կողմէ պատրաստ ենք ամէն ձեւով աջակցելու այդ գործընթացին», եզրափակեց Զախարովա: