«Սոչիի մէջ յայտարարուած եռակողմ յայտարարութիւնը ամբողջութեամբ կը ցոլացնէ Պաքուի մօտեցումները», յայտնեց Ազրպէյճանի արտաքին գործոց նախարար Ճէյհուն Պայրամով շաբաթավերջին կատարած իր յայտարարութեամբ: Ազրպէյճանի արտաքին գործոց նախարարութեան հրապարակած հաղորդագրութեան մէջ Պայրամով յատկապէս կ՛ընդգծէ հաղորդակցութեան, երթեւեկի ճամբաներու մօտալուտ բացման կարելիութիւնը: Հաղորդագրութիւնը նաեւ յատուկ կարեւորութեամբ կը նշէ շրջանի տնտեսական ներուժի դրսեւորման ակնարկող` երկաթուղիներու եւ մայրուղիներու բացման իրականացման ծրագիրներու գործադրութիւնը:
«Բախումներու յաջորդող շրջանին Ազրպէյճան կոչ ուղղած է յանգելու եռակողմ յայտարարութիւններու լրիւ իրականացման` շրջանին մէջ հաղորդակցութեան բոլոր ուղիներու վերաբացման եւ սահմանազատման հոլովոյթի մեկնարկին` մեկնելով միջազգային իրաւունքի սկզբունքներու վրայ հիմնուած յարաբերութիւններու կարգաւորման օգտին», կը նշէ հաղորդակցութիւնը` դիտել տալով, որ Ազրպէյճան պիտի շարունակէ իր քայլերը` 26 նոյեմբեր 2021-ի յայտարարութեան իրականացման գծով: