ՍԱՄՈՒԷԼ ՄԿՐՏՉԵԱՆ
Լիբանանում Հայաստանի Հանրապետութեան դեսպան
Հայաստանի Հանրապետութեան անկախութեան իւրաքանչիւր տարելիցին մենք, բնականաբար եւ անհրաժեշտաբար, անդրադառնում ենք պետականութեան խորհուրդներին:
Անկախութեան հռչակումով նոր դարաշրջան բացուեց ո՛չ միայն Հայաստանի, այլեւ հայութեան բոլոր հատուածների համար: Մեր ժողովուրդը շատ թանկ գին է վճարել իր ազատութեան եւ անկախ պետականութեան համար: Մենք` իբրեւ ազգ եւ պետութիւն, շարունակում ենք մեր հազարամեայ մշտնջենական երթը: Անցնող տարիները եղան մեր ժողովրդի քաղաքական հասունութեան եւ քաղաքացիական գիտակցութեան դրսեւորման ամենաբնորոշ հանգրուանը:
Արդ, պէտք է արձանագրենք, որ պետականութեան առաջնային եւ անանցանելի խորհուրդն է ազգապահպանութիւնը: Որեւէ ժողովուրդ` զրկուած պետականութիւնից, դատապարտուած է իր միջավայրի փոքրամասնութեան, անխուսափելի ստորադասութեան եւ ուծացման:
Հայ ժողովրդի նորագոյն շրջանի պատմութեան ամենաբախտորոշիչ եւ շրջադարձային իրադարձութիւնը 1918 թուականի Հայաստանի Հանրապետութեան հռչակումն էր եւ դարերով կորսուած պետականութեան վերականգնումը: 2018 թուականին` հարիւր տարի անց, մենք տօնում եւ արժեւորում ենք այդ գերարժէք ձեռքբերումը եւ հաւաստում պետականութեան պահպանման եւ ամրապնդման մեր յանձնառութիւնը:
Դա մեզ համար հրամայական է` պահպանելու հայ ժողովրդի ուրոյն նկարագիրը եւ ինքնութիւնը, բերելու իր ներդրումը համաշխարհային ժառանգութեանը: Այս գիտակցութիւնն է, որ պէտք է որդեգրենք, մենք ինքներս դրանով առաջնորդուենք եւ փոխանցենք յաջորդ սերունդներին:
Շնորհաւորում եմ բոլորիս այս փառապանծ տօնի առթիւ: Հայաստանի Հանրապետութիւնն այն ամուր հիմքն է, որի վրայ բարձրանում եւ մարմին է առնում ողջ հայութեան դարաւոր երազանքը:
Ամենայն յարգանօք`