«Ազդակ»-ի առցանց 50-րդ լսարանը տեղի ունեցաւ հինգշաբթի, 16 յունիսին, երեկոյեան ժամը 7:00-ին: Լսարանը, զոր վարեց «Ազդակ»-ի ելեկտրոնային բաժնի աշխատակից Մինաս Հանս Քէհեան, իբրեւ թեմա ունէր «Մոսկուա-Անգարա համագործակցութիւններ եւ մրցակցութիւններ` տարբեր տարածաշրջաններու մէջ»: Դասախօսն էր Պէյրութի ամերիկեան համալսարանի «Իսամ Ֆարես» քաղաքագիտական կեդրոնի աշխատակից Եղիա Թաշճեան:
Երկու երկիրներու համագործակցութիւն-մրցակցութիւն յարաբերութիւններուն, համակարգուած գործողութիւններուն, շահերու բախման կէտերուն ներկայացման համար դասախօսը նկատի ունեցած էր աշխարհագրական երեք միջավայր` Լիպիա, Սուրիա եւ Հարաւային Կովկաս:
Եղիա Թաշճեան նախ ներկայացուց Լիպիոյ պարագան եւ յատկապէս արեւելեան Միջերկրականի մէջ կազմուած ռազմավարական առանցքներուն, միջպետական զօրակցական գիծերուն եւ այդ բոլորին մէջ ռուս-թուրք համագործակցութեան ելեւէջները: Ան յատուկ կեդրոնացաւ նաեւ ընդծովեայ ուժանիւթի տարհանման խնդիրներուն մէջ թուրք-յոյն լարուած յարաբերութիւններուն եւ այդ առումով` Ռուսիոյ դիրքորոշումներուն:
Պատերազմական գործողութիւններու, առաջադրուած նոր ճանապարհներու բացման եւ տիրապետման մօտեցումներու կարեւոր զուգահեռներ գծեց դասախօսը` սուրիական եւ արցախեան պատերազմներուն միջեւ: Իսկ այս բոլորին մէջ շեշտեց, որ համակարգումները ոչ թէ պետական հաստատութենական հիմքեր ունին, այլ աւելի արմատացած են Փութինի եւ Էրտողանի կերպարներուն վրայ, որոնք` կայսերապաշտական նկրտումներէ մեկնած, անցեալի վերականգնման գաղափարախօսութեամբ կ՛առաջնորդուին: Իսկ այս առումով փանթուրանականութենէն կամ սլաւոնականութենէն աւելի` ան կեդրոնացաւ երկու պետութիւններու արտաքին քաղաքականութեան նպատակային հիմնադրոյթներոն վրայ` այդ գաղափարախօսութիւնները համարելով աւելի պատճառաբանական:
Այնուհետեւ ծաւալեցաւ քննարկում` արծարծելով ԵԱՀԿ Մինսքի համանախագահութեան վերականգնումի հնարաւորութիւններու, 3+3 ձեւաչափի ձեւաւորման գործընթացներու եւ իրաւական հարթութեան վրայ հայրենիք-սփիւռք համահայկական օրակարգեր մշակելու եւ ներկայ դժուարին պայմաններուն մէջ նոր դերեր վերցնելու անհրաժեշտութեան վերաբերող նիւթեր:
Բանաձեւելով նիւթը` դասախօսը վերաշեշտեց, որ Անգարա-Մոսկուա յարաբերութիւնները կարելի է բնութագրել իբրեւ ո՛չ թշնամի ո՛չ դաշնակից: