ԵՐԵՒԱՆ, «Նիուզ».- Ատրպէյճանի ուժանիւթի նախարար Փարվիզ Շահպազով Սոֆիայի մէջ մասնակցեցաւ «Ուժանիւթի անցում հարաւ-արեւելեան Եւրոպայի մէջ. տարածաշրջանային համագործակցութիւն ուժանիւթի անվտանգութեան, բազմազանեցում եւ անցում դէպի կանաչ ուժանիւթ» թեմայով նախարարական կլոր սեղանին:
Ելոյթ ունենալով բացման արարողութեան ատեն՝ նախարարը ներկաներուն ուշադրութիւնը հրաւիրեց Եւրոպական Միութեան հետ ուժանիւթի վերաբերող երկխօսութեան վրայ՝ այս տարուան Փետրուարին Ատրպէյճանի նախագահ Իլհամ Ալիեւի եւ Եւրոպական Միութեան ուժանիւթի յանձնակատար Քատրի Սիմսընի հանդիպումէն ետք: Այս մասին կը յայտնէ «Էյ.Փի.Էյ.»ը:
Նախարարը նշեց, որ «Հարաւային կազի միջանցքը» կարճ ժամանակի ընթացքին ապացուցեց իր ռազմավարական նշանակութիւնը՝ ուժանիւթի ճգնաժամի ատեն եւրոպացի սպառողները ապահովելով անխափան եւ շահաւէտ բնական կազով, եւ Ատրպէյճան հաստատակամ է շարունակելու ուժանիւթի յուսալի մատակարարի դերը: Ըստ անոր՝ ընթացիկ տարուան առաջին չորս ամիսներուն, Եւրոպային մատակարարուած է 3.5 միլիառ խորանարդ մեթր ատրպէյճանական կազ՝ 3.1 միլիառ՝ Իտալիոյ, 0.3 միլիառ՝ Յունաստան եւ 0.1 միլիառ՝ Պուլկարիոյ: Ան նաեւ խօսեցաւ ածխաթթուացման եւ կանաչ ուժանիւթի անցնելու Ատրպէյճանի ծրագիրներուն եւ ընթացիկ նախագիծներու մասին: «Բնական կազի հսկայական պաշարներուն զուգահեռ, մեր վերականգնուող ուժանիւթի ներուժը մեծ կարելիութիւններ ստեղծած է Եւրոպական Միութեան հետ յառաջադէմ ուժանիւթային երկխօսութեան հետագայ զարգացման համար», յայտնեց Շահպազով: