Երէկ` հինգշաբթի, 28 յուլիս 2022-ին, Արամ Ա. վեհափառ հայրապետին այցելեց Փաքիստանի դեսպան Սըլման Աթհարի` ընկերակցութեամբ դեսպանատան քաղաքական պատասխանատուներուն:
Վեհափառ հայրապետը անհրաժեշտ տեղեկութիւններ փոխանցեց նոր նշանակուած դեսպանին նախ Լիբանանի ներքին կացութեան առնչուած խնդիրներուն եւ մտահոգութիւններուն, ապա Մեծի Տանն Կիլիկիոյ կաթողիկոսութեան համազգային առաքելութեան, ինչպէս նաեւ Հայաստանի եւ Արցախի մեր ժողովուրդի իրաւունքներուն մասին: Ընդառաջելով դեսպանին փափաքին` վեհափառ հայրապետը անդրադարձաւ միջկրօնական, յատկապէս քրիստոնեայ-իսլամ երկխօսութեան ու գործակցութեան նիւթին` երկար տարիներու իր ունեցած փորձառութեան լոյսին տակ, մատնանշելով կարեւոր դէպքեր ու յատկանշական երեւոյթներ:
Դեսպանը, իր կարգին, շեշտեց քրիստոնեայ-իսլամ երկխօսութեան նոր թափ տալու կարեւորութիւնը` փոխադարձ յարգանքի ու վստահութեան սկզբունքներէն մեկնելով: Ան յիշեց, որ այս ուղղութեամբ իր պետութիւնը յատուկ աշխատանք կը տանի, եւ փափաք յայտնեց, որ յարմար առիթով վեհափառը այցելէ Փաքիստան` հանդիպումներ ունենալու եւ դասախօսութիւններ տալու համար: