ՊՈԼԻՍ.- 18 անձեր «Այս Յանցանքին Մեղսակից Չենք Ըլլար» խորագրեալ յայտարարութենէն ետք հարցաքննուող ակադեմականներու հետ զօրակցելնուն համար իրենք եւս կրկնած էին նոյն յայտարարութիւնը եւ պահանջած էին, որ իրենք ալ դատուին նոյն յանցանքով: Այսպէս դատ յարուցուած էր 18 անձերու դէմ, որոնց մէջ էր նաեւ Արատ Տինք:
Տինք եւ ընկերները կ՛ամբաստանուէին ահաբեկչութիւն քարոզելու մեղադրանքով: Տինք 20 Յունիսին կատարուած դատավարութեան ընթացքին ըսած էր. «Դոյզն իսկ չեմ զղջացած այդ յայտարարութիւնը ստորագրելուս համար: Կը զղջամ միայն այն բանին համար, որ չենք կրցած յաջողիլ մեր խոստումին մէջ: Անարդարութեան դէմ լռողը Սատանան է»: Այս ըսելով՝ ան մերժած էր իրեն վերագրուած յանցանքները: Տինք նաեւ առարկած էր իրեն դէմ տրուելիք որեւէ վճիռին յետաձգման դէմ: Այսինքն ասպարէզ կարդացած էր դատական համակարգին դէմ: Վերջապէս, դատարանը անզօր մնաց իրաւաբանական առումով այս վիճակին իր մատնուած ըլլալուն եւ այս անճարակ երեւոյթին դիմաց եւ որոշեց անպարտ հռչակել այս մեղադրանքով դատարան կանչուած անձերը:
«ԱԿՕՍ»