Արեւելեան Միացեալ Նահանգներու Հայ օգնութեան միութիւնը կը տեղեկացնէ, թէ 25.000 տոլար կը նուիրէ ՀՕՄ-ի Կեդրոնական վարչութեան` արձագանգելով Լիբանանի տնտեսական տագնապին եւ քաղաքական անկայուն իրավիճակին, որ ահաւոր կերպով կ՛ազդէ լիբանանահայութեան վրայ:
Տարուան սկիզբը, արդէն իսկ առկայ քաղաքական եւ տնտեսական տագնապը շարունակեց ազդել Լիբանանի հայ համայնքին վրայ. ՀՕՄ-ը կոչ ուղղեց սփիւռքահայութեան` օգնելու իր հայրենակիցներուն, որոնք դժուարութեամբ կ՛ապահովէին իրենց ապրուստը: Լիբանանի ՀՕՄ-ը նախաձեռնեց 3 ծրագիրներու` պնակ մը կերակուր, գոյատեւման պիտոյքներ եւ յոյսի արկղ: Այս ծրագիրներուն ճամբով կարելի պիտի ըլլար ապահովել ուտելիք, մթերային ապրանքներ, դեղորայք եւ այլ հիմնական կարիքներ:
Կոչին յաջորդող ամիսներուն «Քորոնա» ժահրը շատ աւելի վատթարացուց Լիբանանի տնտեսական վիճակը: ՀՕՄ-ի Արեւելեան շրջանի մասնաճիւղերը ստիպուած էին յետաձգել իրենց դրամահաւաքի ձեռնարկները, հետեւելով այս ժահրին ստեղծած իրավիճակին: Սակայն, անոնք կրցան նուիրատուութիւններ հաւաքել գաղութի անդամներէն` Լիբանանի հայրենակիցներուն օգնելու համար:
«Լիբանանը մեր սփիւռքի սիւնն է, եւ մենք հպարտ ենք, որ մեր մասնաճիւղերն ու նուիրատուները անգամ մը եւս ընդառաջեցին մեր կոչին: Մեր մասնաճիւղերու եւ գաղութներու անդամներուն առատաձեռնութիւնը յաւելեալ ուժ կու տայ, որպէսզի շարունակենք ՀՕՄ-ի մարդասիրական առաքելութիւնը», ըսաւ ՀՕՄ-ի Արեւելեան շրջանի վարչութեան ատենապետ Անի Աթթար:
ՀՕՄ-ի Արեւելեան Ամերիկայի շրջանը պիտի շարունակէ հաւաքել նուիրատուութիւններ Լիբանանի հայ համայնքին օգնելու համար: Կը խնդրուի նուիրատուներէն, որ շարունակեն աջակցիլ մարդասիրական այս աշխատանքին` առցանց նուիրատուութիւն կատարելով: