Արցախի Հանրապետութեան արտաքին գործոց նախարարութիւնը տարածած է յայտարարութիւն մը` Ազրպէյճանի մէջ հաւատարմագրուած դիւանագէտներու` Արցախի բռնագրաւուած տարածքներ այցելութեան առնչութեամբ:
Ստորեւ` Արցախի Հանրապետութեան արտաքին գործոց նախարարութեան յայտարարութիւնը.
«Խստագոյնս դատապարտում ենք 2021 թուականի յուլիսի 10-ին ազրպէյճանական իշխանութիւնների կողմից Ազրպէյճանում հաւատարմագրուած օտարերկրեայ դիւանագիտական առաքելութիւնների աշխատակիցների այցի կազմակերպումը Արցախի Հանրապետութեան բռնագրաւուած տարածքներ, այդ թւում` քաղաք Շուշի:
Նմանատիպ գործողութիւններով Ազրպէյճանը փորձում է ամրագրել 2020 թուականի սեպտեմբերի 27-ին Թուրքիայի եւ միջազգային ահաբեկչական ու ծայրայեղական կազմակերպութիւնների անդամների աջակցութեամբ Արցախի Հանրապետութեան դէմ իր կողմից սանձազերծուած նախայարձակ պատերազմի արդիւնքները: Եւս մէկ անգամ ընդգծում ենք, որ ներկայիս իրավիճակն Ազրպէյճանի ապօրինի գործողութիւնների հետեւանք է: Ազրպէյճանը կոպտօրէն խախտել է միջազգային իրաւունքի հիմնարար սկզբունքները, ինչպիսիք են ուժի կամ ուժի սպառնալիքի չկիրառում, վէճերի խաղաղ կարգաւորում, մարդու իրաւունքների եւ հիմնարար ազատութիւնների յարգում, ժողովուրդների իրաւահաւասարութեան եւ սեփական ճակատագիրը տնօրինելու իրաւունք, ինչպէս նաեւ միջազգային պարտաւորութիւնների բարեխիղճ կատարում:
Ազրպէյճանի` ներկայիս ապօրինի իրողութիւններն օրինականացնելու փորձերը նշանակում են նաեւ սանձազերծուած պատերազմի, միջազգային ահաբեկիչների հետ համագործակցութեան, միջազգային մարդասիրական իրաւունքի չափանիշների խախտման եւ ռազմական յանցագործութիւնների արդարացում: Ափսոսանք է առաջացնում այն փաստը, որ Ազրպէյճանում հաւատարմագրուած օտարերկրեայ դիւանագէտները ենթարկուել են Ազրպէյճանի նենգամիտ գործողութիւններին, որոնք ո՛չ միայն միտուած են ազրպէյճանա-ղարաբաղեան հակամարտութեան համապարփակ կարգաւորման գործընթացի վերսկսումը թոյլ չտալուն, այլ նաեւ խարխլում են միջազգային յարաբերութիւնների կարգերը` հիմքեր ստեղծելով ապօրինի գործողութիւնների արդիւնքներն ընդունելի կանոն ճանաչելու համար: Ուժի սպառնալիքի կամ կիրառման արդիւնքում ձեռք բերուած ոչ մի տարածքային նուաճում պէտք չէ ճանաչուի օրինական:
Կրկին յայտարարում ենք, որ 44-օրեայ պատերազմի ընթացքում Թուրքիայի եւ միջազգային ահաբեկիչների աջակցութեամբ Ազրպէյճանի կողմից զաւթուած Արցախի Հանրապետութեան տարածքները` Շուշի քաղաքը ներառեալ, միջազգային իրաւունքի չափանիշների համաձայն ժամանակաւորապէս գրաւուած տարածքներ են: Ինչպէս տարածքային, այնպէս էլ մշակութային, տնտեսական եւ պատմական առումներով Շուշին Արցախի անքակտելի մասն է: Այն անջատելու ցանկացած փորձ Արցախի Հանրապետութեան տարածքային ամբողջականութեան կոպիտ խախտում է:
Արցախի Հանրապետութեան տարածքային ամբողջականութեան վերականգնումը եւ Արցախի կողմից միջազգային իրաւակողմնակալութեան ձեռքբերումը հակամարտութեան համապարփակ կարգաւորման եւ տարածաշրջանում կայուն խաղաղութեան հաստատման պարտադիր պայմաններ են: Կոչ ենք անում ԵԱՀԿ-ի Մինսքի խմբի համանախագահ երկրներին բանակցային գործընթացի վերսկսմանն ուղղուած քայլեր ձեռնարկել` ազրպէյճանա-ղարաբաղեան հակամարտութեան վերջնական կարգաւորման նպատակով»: