ԵՐԵՒԱՆ, «Ազատութիւն».- Ռուսիոյ նախագահ Վլատիմիր Փութինի եւ Ատրպէյճանի նախագահ Իլհամ Ալիեւի միջեւ շուրջ չորս ժամ տեւած բանակցութիւններէն ետք, Ատրպէյճանի նախագահը անգամ մը եւս պահանջեց, որ Հայաստան կատարէ 9 Նոյեմբերի համաձայնագիրով ստանձնած պարտաւորութիւնները` Արցախէն դուրս հանելով զօրքերը եւ ապահովելով հաղորդակցութիւնը Ատրպէյճանի հիմնական մասին եւ Նախիջեւանի միջեւ:
Թէ՛ Ալիեւ, եւ թէ Փութին բանակցութիւններուն եւ անկէ ետք յայտարարեցին, որ երկու երկիրներու միջեւ յարաբերութիւնները նոր փուլ թեւակոխած են։ Անոնք նաեւ ստորագրեցին համագործակցութեան հռչակագիր մը։
Պաքուի պնդումով, 22 Փետրուարին ստորագրուած փաստաթուղթին մէջ նշուած է, թէ «անվտանգութիւնը ապահովելու, խաղաղութիւնն ու կայունութիւնը պահպանելու համար Ռուսիա եւ Ատրպէյճան կրնան քննարկել միմիանց ռազմական օգնութիւն տրամադրելու կարելիութիւնը»:
Ալիեւ նաեւ շեշտեց, թէ հռչակագիրով կողմերը կը ճանչնան իրարու տարածքային ամբողջականութիւնը եւ պարտաւոր են չմիջամտելու իրարու ներքին գործերուն:
Փութինը խոստովանեցաւ, թէ այս նոր փուլին` դաշնակցային յարաբերութիւններուն, կողմերը հասած են «նաեւ ղարաբաղեան հակամարտութեան կարգաւորման շնորհիւ»:
Այս ծիրին մէջ ան ընդգծեց, թէ խնդիրը դեռ վերջնականապէս կարգաւորուած չէ, բայց կարգաւորման ընթացքի մէջ է։ «Կան վէճեր, շատ աշխատանք կայ կատարելու, սակայն ամէն ինչ պիտի ընենք, որպէսզի հոլովոյթը խաղաղ ուղիով ընթանայ։ Արդէն կան որոշ համաձայնութիւններ առեւտրատնտեսական կապերու, փոխադրական հաղորդակցութիւններու զարգացման վերաբերեալ», յայտնեց Ռուսիոյ նախագահը։