Հայկական երեսփոխանական պլոքի եւ ՀՅԴ Լիբանանի Կեդրոնական կոմիտէի ներկայացուցիչ, երեսփոխան Յակոբ Բագրատունի, «Շաղզոյեան» կեդրոնի իր գրասենեակին մէջ ընդունեց Քորէայի նոր նշանակուած դեսպան Փարք Իլը, որուն հետ քննարկեց Լիբանան-Քորէա յարաբերութիւնները` իբրեւ երկու երկիրներուն միջեւ յարաբերութիւններու Լիբանանի խորհրդարանական յանձնախումբի նախագահ:
Հանդիպումի ընթացքին Բագրատունի ներկայացուց խորհրդարանական ընտրութիւններէն ետք եւ նոր կառավարութեան կազմութեան սեմին երկրին մէջ տիրող ընդհանուր կացութիւնը:
Ապա անդրադարձ կատարուեցաւ Լիբանանի մէջ Քորէայի դեսպանատան ունեցած եւ գործադրած ծրագիրներուն: Յատուկ ուշադրութեան առարկայ դարձաւ դեսպանատան ներդրումը Այնճար հայաւանի զարգացման ծրագիրներուն:
Բագրատունի դեսպանին ներկայացուց հայ համայնքի իրավիճակը կրթական, ընկերային, առողջապահական եւ մշակութային բնագաւառներուն մէջ եւ անհրաժեշտ նկատեց, որ դեսպանատունը իր յառաջիկայի ծրագիրներուն մէջ նկատի ունենայ օժանդակութեան եւ ներդրումային կարելիութիւններ: